بالائی تے وسطی علاقیاں اچ آوݨ آلے ݙو ݙین٘ہاں دے دوران اندھاری، جھکڑ تے ڳاڄ کھمݨ دے نال مینہ وسݨ دا امکان اے، محکمہ موسمیات

راولپنڈی۔06 جولائی (اے پی پی) محکمہ موسمیات ملک دے بالائی تے وسطی علاقیاں اچ آوݨ آلے ݙو ݙین٘ہاں دے دوران تیز ہواواں، اندھاری، جھکڑ تے گرج چمک دے نال بارش دی پیش گوئی کریندیں ہوئیں متعلقہ اداریاں، سیاحاں، مسافراں تے کساناں کوں احتیاطی تدابیر اختیار کرݨ دی ہدایت کیتی اے۔ سنوار کوں محکمہ موسمیات دے مطابق مرطوب ہواواں مسلسل بحیرہِ عرب توں ملک دے بالائی علاقیاں اچ داخل تھیندیاں پئن جڈانجو اج شام تے رات توں خلیجِ بنگال توں وی مرطوب ہواواں دے شمال مشرقی علاقیاں اچ داخل تھیوݨ دا امکان اے۔ ایں توں علاوہ آوݨ آلے 12 گھنٹیاں دے دوران مغربی ہواواں دا ہک سلسلہ وی ملک دے بالائی علاقیاں تے اثر انداز تھیسی جئیں پاروں مختلف علاقیاں اچ بارشاں دا نواں سلسلہ شروع تھیوݨ دی توقع اے۔ محکمہ موسمیات دے مطابق کشمیر تے خیبر پختونخوا اچ 6 جولائی دی رات توں 8 جولائی تائیں مختلف مقامات تے تیز ہواواں، اندھاری تے گرج چمک دے نال وقفے وقفے نال بارش دا امکان اے جڈانجو بعض علاقیاں اچ موسلادھار بارش وی تھی سڳدی اے۔ اینویں 7 تے 8 جولائی دے دوران وزیرستان، بنوں تے ڈیرہ اسماعیل خان اچ وی کجھ ڄہیں تے تیز ہواواں تے گرج چمک دے نال بارش دی توقع ظاہر کیتی ڳئی اے۔ پیش گوئی دے مطابق اسلام آباد، راولپنڈی، مری، گلیات، اٹک، چکوال، جہلم سمیت پنجاب دے مختلف اضلاع اچ وی 6 جولائی دی شام تے رات توں 8 جولائی تائیں وقفے وقفے نال تیز ہواواں، اندھاری تے گرج چمک دے نال بارش دا امکان اے جڈانجو کجھ مقامات تے موسلادھار بارش وی متوقع اے۔ محکمہ موسمیات خبردار کیتے جو موسلادھار بارش، تیز اندھاری تے آسمانی بجلی ݙہݨ دے باعث کمزور تعمیرات، سولر پینلز، بجلی دے کھمبیاں تے بل بورڈز کوں نقصان دا خدشہ اے۔ 7 تے 8 جولائی دے دوران بالائی خیبر پختونخوا، گلگت بلتستان تے کشمیر دے پہاڑی علاقیاں اچ لینڈ سلائیڈنگ دا خطرہ وی موجود اے جڈانجو کشمیر، خیبر پختونخوا، گلگت بلتستان دے مقامی ندی نالیاں تے ڈیرہ غازی خان دے پہاڑی برساتی نالیاں اچ پاݨی دے بہاؤ اچ اضافے دا امکان ظاہر کیتا ڳئے۔ محکمہ موسمیات سیاحاں تے مسافراں کوں غیر ضروری سفر توں گریز تے دورانِ سفر انتہائی احتیاط کرݨ دی ہدایت کیتی اے، جڈانجو کساناں کوں مشورہ ݙتا ڳئے جو او موسمی صورتحال کوں ݙیکھدیں ہوئیں فصلاں تے مویشیاں دے تحفظ کیتے ضروری اقدامات کرن۔ محکمہ موسمیات دے مطابق بارشاں دے ایں سلسلے دے باعث ملک دے مختلف علاقیاں اچ جاری شدید گرمی دی شدت اچ بتدریج ڳھٹکی آوݨ دا وی امکان اے۔ ادارے تمام متعلقہ محکمیاں کوں الرٹ رہوݨ تے کہیں وی ناخوشگوار صورتحال نال نٻڑݨ کیتے پیشگی انتظامات مکمل رکھݨ دی ہدایت کیتی اے۔