وزیرِاعظم دی پروٹیکٹریٹ آف امیگریشن دے نظام کوں ڈیجیٹائز کرݨ تے ٻاہرلے ملک روزگار دے موقع بارے آگاہی کیتے اقدامات تکھے کرݨ دی ہدایت

اسلام آباد۔6 جولائی (اے پی پی) وزیرِاعظم محمد شہباز شریف پروٹیکٹریٹ آف امیگریشن دے سارے نظام کوں ڈیجیٹائز کرݨ تے پاکستانی سفارتخانیں کوں ٻاہرلے ملک روزگار دے موقع توں آگاہی ݙیوݨ کیتے اقدامات تکھےکرݨ دی ہدایت کریندیں آکھیے جو پاکستان دی افرادی قوت باصلاحیت اے، حکومت بین الاقوامی معیار دی تعلیم و عالمی سطح تے رسائی کیتے ہرممکن اقدامات چیندی پئی اے۔ وزیرِ اعظم دفتر دے میڈیا ونگ توں جاری بیان موجب وزیرِاعظم محمد شہباز شریف دی زیرِ صدارت نوجواناں کوں روزگار ݙیوݨ دے حوالے نال جائزہ اجلاس اتھاں منعقد تھیا۔ اجلاس اچ نائب وزیرِاعظم و وزیرِ خارجہ سینیٹر محمد اسحاق ڈار، وفاقی وزراء ڈاکٹر مصدق ملک، عطاء اللہ تارڑ، چوہدری سالک حسین، وزیرِ مملکت بلال اظہر کیانی، چیئرمین نیوٹیک راجا قمر الاسلام، چیئرمین وزیرِاعظم یوتھ پروگرام رانا مشہود احمد خاں تے متعلقہ اعلیٰ حکام شریک تھئے۔اجلاس توں خطاب کریندیں وزیرِاعظم ٻاہرلے ملک پاکستانی سفارتخانیں کوں پاکستانی افرادی قوت کیتے روزگار دے موقع دی تلاش اچ تیزی گھن آوݨ، پروٹیکٹریٹ آف امیگریشن دے سارے نظام کوں ڈیجیٹائز کرݨ تے افرادی قوت بالخصوص نوجواناں کوں سمندر پار پاکستانیاں دی وزارت، نیوٹیک تے یوتھ پروگرام ہنر تے مختلف زباناں دے کورسز بمعہ سرٹیفیکیشنز یقینی بݨاوݨ دی ہدایت کیتی۔ وزیرِاعظم آکھیا جو پاکستان دی افرادی قوت باصلاحیت اے، بین الاقوامی معیار دی تعلیم و عالمی سطح تے رسائی کیتے ہرممکن اقدام چیندے پیوں۔ انھاں پاکستانی سفارتخانیں کوں ٻاہرلے ملک میسر روزگار دے موقع توں آگاہی تے ڈیٹا ݙیوݨ کیتے اقدامات تکھے کرݨ دی ہدایت کریندیں آکھیا جو پاکستانی سرٹیفیکیشنز کوں بین الاقوامی معیار نال ہم آہنگ کرݨ کیتے سارے ادارے مختلف ملکاں نال رابطے تکڑے کرن۔ انھاں آکھیا جو جنھاں ملکاں اچ پاکستانی ہنرمند افراد کیتے روزگار دے موقع میسر ہن، انھاں دی زبان دی تعلیم بمعہ سرٹیفیکیشنز یقینی بݨائی ونڄے۔ انھاں نیوٹیک دے تحت تکنیکی و فنی تربیت دے اداریں دی کارکردگی تے کنٹری آف ڈیسٹینیشن سینٹرز دے قیام تے رپورٹ پیش کرݨ دی وی ہدایت کیتی۔وزیرِاعظم کوں افرادی قوت بالخصوص نوجواناں کیتے روزگار دے موقع تے تفصیلی بریفنگ ݙتی ڳئی جیں اچ ݙسایا ڳیا جو ڈیجیٹل یوتھ ہب اچ 8 لکھ نوجوان رجسٹر تھی چکئن، ٻاہرلے ملک تعمیرات، زراعت، سیاحت، صحت، ٹرانسپورٹ، بائیوٹیکنالوجی، مینوفیکچرنگ، انفارمیشن ٹیکنالوجی، انجینئرنگ، نرسنگ، ادویہ سازی، اشیائے خوردونوش دی تیاری تے شپ بلڈنگ دے شعبیں اچ روزگار دے موقع موجود ہن۔ بریفنگ موجب اِنھاں شعبیں اچ پاکستانیاں کوں روزگار ݙیوݨ کیتے تربیتی پروگرام جاری ہن، پاکستانی سفارتخانے مختلف ملکاں اچ میسر روزگار دے موقع تے انھاں کیتے درکار قابلیت ڈیجیٹل یوتھ ہب پورٹل تے ݙیسن۔