ملکی تاریخ اچ پہلی واری ریلوے 115 ارب روپے ریونیو کمائے، حنیف عباسی

لاہور۔6 جولائی (اے پی پی) وفاقی وزیرِ ریلوے حنیف عباسی آکھیے جو وزیرِاعظم محمد شہباز شریف دے ویژن دے تحت پاکستان ریلوے کوں منافع بخش ادارہ بݨاوݨ کیتے ݙینھ رات کوشاں ہیسے، ملکی تاریخ اچ پہلی واری سال 2026-2025 اچ ریلوے 115 ارب روپے ریونیو کمائے، کرپشن دا خاتمہ اولین ترجیح اے، ڈیجیٹلائزیشن دا عمل کامیابی نال جاری اے، حادثیں توں بچݨ کیتے پراݨیاں عمارتاں کوں بحال کیتا ویندا پئے، پاور پلانٹس دی کمی پوری کرݨ کیتے سارے وسائل بروئے کارگھن آئے ویندے پئن، پاکستان ریلویز چارے صوبیں کوں آپت اچ جوڑیا ہویا اے۔ انھاں اے ڳالھ ریلویز ہیڈ کوارٹرز اچ ہک پریس کانفرنس توں خطاب کریندیں آکھی ۔ ایں موقع تے چیف ایگزیکٹو افسر ریلوے حفیظ اللہ، ایڈیشنل جنرل منیجر مکینیکل محمد یوسف، ایڈیشنل جنرل منیجر ٹریفک سفیان سرفراز ڈوگر، ایڈیشنل جنرل منیجر انفراسٹرکچر حماد حسن مرزا تے ٻئے وی موجود ہن۔وفاقی وزیر آکھیا جو وزیرِاعظم محمد شہباز شریف دی ہدایت تے انھاں دے ویژن دے تحت پاکستان ریلوے کوں منافع بخش ادارہ بݨاوݨ کیتے ٹھوس اقدامات چاتے ویندے پئن، پاکستان ریلوے 78 سالاں اچ پہلی واری 115 ارب روپے کمائے۔ وفاقی وزیر آکھیا جو ریلوے مسافر ٹریناں توں ساڈھے 50 ارب روپے، فریٹ توں 41 ارب روپے، پراپرٹی اینڈ لینڈ توں 12 ارب روپے، کمرشل توں 2 ارب روپے تے سکریپ توں 2 ارب روپے کمائن، ریلوے فریٹ اچ گروتھ 27.78 فیصد، مسافر ٹریناں اچ پچھلے سال دے مقابلے اچ 48 دے بجائے 51 ارب روپے کمائن، گڈ گورننس دی پاروں ریلوے انکم اچ بتدریج ودھارا تھئے، سال 24-2023 اچ 88 ارب، سال 25-2024 اچ 92 ارب تے ہݨ سال 26-2025 اچ 115 ارب روپے آمدݨ حاصل تھئی اے، ایں سنگِ میل کوں حاصل کرݨ دے پچھوں سارے ریلوے ملازمین تے افسراں دی ݙینھ رات دی محنت شامل اے، جیں تے میں انھاں کوں خراجِ تحسین پیش کرینداں، ایں سال فریٹ ٹریناں توں 65 ارب روپے تے پسنجر ٹریناں توں 60 ارب روپے ریونیو پیدا کرݨ دا ہدف رکھا ڳئے جیں کوں حاصل کر گھنسوں۔حنیف عباسی آکھیا جو کرپشن مکاوݨ تے ریلوے کوں تجارتی نقل و حمل کیتے ہک تکھا، قابلِ اعتماد تے سستا ذریعہ بݨاوݨ تے توجہ مرکوز اے، ساݙا بنیادی ہدف ادارہ جاتی خسارے کوں گھٹ کرݨ تے ڈیجیٹل ٹرانسفارمیشن دے ذریعے نظام کوں بہتر بݨاوݨ اے، ڈیجیٹلائزیشن دا پہلا فیز اڄوکے سال 30 جون کوں مکمل کیتا ڳئے، وزیرِاعظم محمد شہباز شریف دی ہدایت تے ڈیجیٹلائزیشن دا ݙوجھا فیز 31 دسمبر تئیں مکمل کیتا ویسی۔ انھاں آکھیا جو ریلوے اچ میرٹ دی بنیاد تے ٹھیکے ݙتے ویندے پئن، جیں کیتے اوپن آکشن تھیندی اے، کہیں من پسند لوکاں کوں ٹھیکہ نئی ݙتا ڳیا، بادامی باغ آکشن اچ 52 ملین روپے دے بجائے 450 ملین روپے کمائے، میݙا سیلون پہلے ٹیکسی دی کار استعمال تھیندا ریہا ایں توں دستبردار تھی ڳیاں، صرف ہک واری ہی استعمال کیتا، ریلوے دی ہک فری ٹکٹ گھر دے ملازم کوں وی نئی ݙتی، ہݨ صرف میرٹ دی بنیاد تے ہی کم تھیسن۔حنیف عباسی آکھیا جو پچھلے 9 مہینے توں لوکوموٹیو دی مینٹیننس نئی کیتی ڳئی، پاور پلانٹس دی وی کمی اے، پاور پلانٹس بہتر کریندے پیوں ، 30 ستمبر تئیں اے ایشو حل کر گھنسوں، 16 پاور پلانٹ ریونیو توں گھنسوں، جیں کیتے ٹینڈر کر ݙتا ڳئے، 80 پاور پلانٹ 23 مارچ تئیں ریلوے اچ آویسن، لوکوموٹیو دی اوور ہالنگ کروائی ویندی پئی اے، نویں پاور پلانٹس دا ڈیٹا وی جمع کریندے پیوں۔ حنیف عباسی آکھیا جو پرائیویٹ کیتیاں ڳئیاں 5 ٹریناں توں 3 ارب روپے دا ریونیو کمائے، باقی ٹریناں وی پرائیویٹائز کریندے پیوں، عوام ایکسپریس دے 3 ریک آچکن۔ انھاں آکھیا جو ایم ایل ون ٹو تھری ریلوے دی بحالی کیتے ناگزیر اے، ایشین ڈویلپمنٹ بینک نال ڳالھ مہاڑ کریندے پیوں ، روہڑی جنکشن کوں نویں سرے توں بݨاوݨ ویندے پیوں، ایم ایل ون دا وزیرِ اعظم توں وقتی افتتاح کرویسوں، ایں منصوبے دی تکمیل نال روہڑی توں کراچی دے سفر اچ 5 گھنٹے دی کمی تھیسی، اِنھاں منصوبیں اچ پبلک پرائیویٹ پارٹنرز کوں شامل کریسوں۔انھاں آکھیا جو ریلوے چارےصوبیں کوں جوڑیا ہویا اے، بلا تفریق سارے صوبیں اچ ترقیاتی منصوبیں دا آغاز کیتا، صوبیں اچ پہلی واری 8 برانچ روٹ بݨاوݨ ویندے پیوں ، اورنج ٹرین دیہاتاں توں وی گزرسی، پیپلز ٹرین کیتے بلوچستان حکومت فنڈز ݙتن، سندھ اچ وی 2 روٹس تے کم کرݨ کیتے ایم او یو تے دستخط ہووݨ ویندے پیوں۔ انھاں آکھیا جو ریلوے کوں جدید خطوط تے استوار کرݨ کیتے سارے وسائل بروئے کار گھن آئے ویندے پئن، ریلوے جی پی فنڈز پنجاہ کروڑ روپے دی ادائیگی تھی ڳئی اے، وفاقی حکومت 63 ارب روپے پنشن کیتے ݙیندی اے جیں کوں ملازمین تے خرچ کر ݙتا ویندے، ملازمین کوں بنیادی سہولتاں ݙیوݨ اولین ترجیح اے، راولپنڈی اچ گارڈ روم ریسٹ ایریا سوہݨا بݨائے، خانیوال، کوٹری، روہڑی، لاہور، پشاور اچ وی سٹیٹ آف دی آرٹ گارڈ روم بݨیسوں۔ حنیف عباسی آکھیا جو کاہنہ جیھے واقعات دا انتظار نہ کریسوں، بوسیدہ کوارٹرز کوں نواں بݨاوݨ ویندے پیوں، ایویں ہی ریلوے دے سکولاں اچ بہترین تعلیم ݙتی ویندی پئی اے، ریلوے دے ہسپتالاں کوں پرائیویٹائز کریندے پیوں تاں جو ملازمین کوں بہترین طبی سہولتاں ݙیوݨ یقینی بݨایا ونڄ سڳے۔