اقوامِ متحدہ دے چارٹر تے بین الاقوامی قانون دی مکمل پاسداری دے نال اے آئی نظام تیار تے نافذ کیتے ونڄن، شزا فاطمہ خواجہ دا اجلاس توں خطاب

جنیوا۔7 جولائی (اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزا فاطمہ خواجہ آکھیے جو مصنوعی ذہانت (اے آئی) دے نظام بین الاقوامی قانون تے اقوامِ متحدہ دے چارٹر دی مکمل پاسداری دے نال تیار تے نافذ کیتے ونڄݨے چاہیدن جڈانجو شہری تے سکیورٹی ݙوہیں شعبیں اچ موثر انسانی نگرانی کوں یقینی بݨاوݨ ضروری اے۔ اِے ڳالھ انہاں اتھاں گلوبل ڈائیلاگ آن آرٹیفیشل انٹیلی جنس گورننس دے تحت محفوظ، محفوظ ترتے قابلِ اعتماد مصنوعی ذہانت، مختلف طریقہ کار اچ ہم آہنگی تے مطابقت دے موضوع تے تھیوݨ آلے اجلاس توں خطاب کریندیں آکھی۔ انھاں آکھیا جو مصنوعی ذہانت دا محفوظ استعمال پوری دنیا دا سانجھا مفاد اے، تاں جو ایں دے حفاظتی اصول وضع کرݨ دا عمل شفاف، جامع تے سارے ملکاں دی مساوی نمائندگی تے مبنی ہووݨا چاہیدے۔شزا فاطمہ آکھیا جو ایں ویلھے قابلِ اعتماد اے آئی دے حفاظتی معیارات تے پیمانے کجھ ملکاں تے ٹیکنالوجی کمپنیاں دے قومی فریم ورکس دے ذریعے ترتیب ݙتے ویندے پئن جیں پاروں ترقی پذیر ملک ایں عمل توں وݙی حد تیں ٻاہر رہ ڳئن۔ انھاں آکھیا جو تحفظ صرف ہک تکنیکی معاملہ نئی بلکہ ایں دا تعلق زبان، ثقافت تے مقامی حقائق نال وی اے۔ جے ترقی پذیر ملکاں دی شمولیت دے بغیر معیارات بݨائے ڳئے تاں او اجتماعی اتفاقِ رائے دے بجائے ٻئیں تے مسلط کیتے ڳئے اصول بݨ ویسن۔ وفاقی وزیر آکھیا جو پاکستان اقوامِ متحدہ دے پلیٹ فارم دے تحت جامع تے کثیرالجہتی مشاورت دے ذریعے اے آئی دے عالمی حفاظتی اصول مرتب کرݨ دی حمایت کریندے تاں جو سارے ملک مساوی شراکت دار دے طور تے آپݨی صلاح ݙے سڳن۔ انھاں آکھیا جو پاکستان گلوبل ڈیجیٹل کمپیکٹ دے وژن موجب اے آئی گورننس دے ایجھے نظام دی حمایت کریندے جیڑھا مختلف ملکاں دے ضابطہ جاتی فریم ورکس دے وچال ہم آہنگی پیدا کرے۔انھاں موجب ایں توں سرحد پار تجارت، تحقیق تے ڈیٹا دے بہاؤ کوں ودھارا ملسی جڈانجو ہر ملک آپݨا ریگولیٹری نظام برقرار رکھ سڳسی، تاں جو انھاں خبردار کیتا جو اے ہم آہنگی چند ملکاں دے قوانین ٻئیں تے نافذ کرݨ دا ذریعہ نئی بݨݨی چاہیدی بلکہ مختلف نظاماں وچال رابطے دا پل ثابت ہووݨی چاہیدی اے۔ شزا فاطمہ زور ݙتا جو عالمی سطح تے اے آئی دے معیارات کھلے، شفاف تے اشتراکی معیار سازی دے اداریں دے ذریعے مرتب کیتے ونڄن تاں جو مصنوعی ذہانت دے پورے لائف سائیکل اچ حفاظت، قابلِ اعتماد کارکردگی، انسانی حقوق دے احترام تے لسانی و ثقافتی تنوع کوں یقینی بݨایا وڃ سڳے۔ انھاں آکھیا جو مصنوعی ذہانت تے اعتماد ایں ہی ویلھے ممکن اے جڈانجو ملکاں کنے اے آئی نظاماں دی آزادانہ جانچ، تجزیہ تے تصدیق دی صلاحیت موجود ہووے۔ اے آئی نظاماں دی جانچ تے تصدیق دی صلاحیت زیادہ تر انھاں ملکاں اچ موجود اے جتھاں اے ٹیکنالوجی تیار کیتی ویندی اے۔ ترقی پذیر ملکاں توں اے توقع نئی کیتی وڃ سڳدی جو او آپݨی تصدیقی صلاحیت دے بغیر صرف ٻاہرلیاں یقین دہانیاں تے انحصار کرن۔ انھاں ترقی پذیر ملکاں اچ اے آئی دی جانچ تے گورننس دیاں صلاحیتاں کوں تکڑا بݨاوݨ کیتے مشترکہ ٹولز، تکنیکی تعاون تے علاقائی شراکت داری ودھاوݨ تے زور ݙتا۔ وفاقی وزیر آکھیا جو محفوظ تے قابلِ اعتماد مصنوعی ذہانت دا مطلب اے نئی ہووݨا چاہیدا جو تحفظ صرف چند ملکاں تئیں محدود رہے جڈانجو باقی دنیا کیتے اے نظام غیر شفاف ہووے۔ انھاں عالمی شراکت داراں تے اجلاس دے شریک سربراہیں دے نال رل تے مصنوعی ذہانت دی حکمرانی کیتے ہک جامع، شفاف تے پائیدار عالمی فریم ورک دی تشکیل کیتے پاکستان دے عزم دا اعادہ کیتا