صدر آصف علی زرداری دی کرغز ہم منصب نال ملاقات، ݙوپاسے تعلقات مزید تکڑے بݨاوݨ تے اتفاق

بشکیک۔7 جولائی (اے پی پی) صدرِ مملکت آصف علی زرداری اعلیٰ سطح دے ہک وفد دے رلے آپݨے سرکاری دورہِ کرغزستان دے دوران جمہوریہ کرغزستان دے صدر سادیر ژاپاروف نورگوجوئیوچ نال ملاقات کیتی۔ ایوانِ صدر دے پریس ونگ توں جاری بیان موجب صدرِ مملکت دا اے دورہ پاکستان تے کرغزستان وچال پراݨی دوستی تے آزمودہ تعلقات کوں ظاہر کریندے جیڑھے سانجھے عقیدے، سانجھی تاریخ تے ثقافتی ہم آہنگی تے مبنی ہن۔ ملاقات توں پہلے رخ اوردو کلچرل سینٹر اچ صدرِ مملکت دے اعزاز اچ سرکاری استقبالیہ تقریب منعقد کیتی ڳئی۔ ملاقات اچ ݙوہیں رہنماواں پاکستان تے کرغزستان دے وچال بھرپی دے تعلقات کوں مزید تکڑا بݨاوݨ دے مختلف پہلواں تے ڳالھ کیتی ۔انھاں ݙوپاسے تعاون دے سارے شعبیں دا جائزہ ڳھدا تے تجارت، توانائی، رابطہ سازی، سیاسی و تجارتی تعاون، ثقافت، تعلیم، عوامی رابطے تے کاسا-1000 منصوبے تے پیش رفت سودھے مختلف شعبیں اچ تعاون دے نویں موقع تے غور کیتا۔ ایں موقع تے اقتصادی، ثقافتی، بین الپارلیمانی تے تزویراتی شراکت داری کوں مزید وسعت ݙیوݨ دی صلاحیت کوں وی اجاگر کیتا ڳیا۔ صدر آصف علی زرداری دسمبر 2025ء اچ کرغز صدر دے سرکاری دورہِ پاکستان دا ذکر کریندیں آکھیا جو گزریل ݙو ݙہاکیں اچ کہیں وی کرغز صدر دا اے پہلا دورہِ پاکستان ہئی جیں ݙوپاسے تعلقات اچ نویں روح پھوک ݙتی تے ایں دے نتیجے اچ 16 معاہدیں تے مفاہمتی یادداشتاں تے دستخط تھئے۔ انھاں آکھیا جو پاکستان دی ’’وژن سینٹرل ایشیا‘‘ پالیسی اچ کرغزستان کوں اہم مقام حاصل اے۔ صدر آصف علی زرداری کرغز صدر کوں 2027۔28 دی مدت کیتے اقوامِ متحدہ دی سلامتی کونسل دے غیر مستقل رکن دے طور تے کرغزستان دے تاریخی انتخاب تے مبارخ ݙتی۔صدرِ مملکت آکھیا جو پاکستان اقوامِ متحدہ، اسلامی تعاون تنظیم (او آئی سی)، اقتصادی تعاون تنظیم (ای سی او)، شنگھائی تعاون تنظیم (ایس سی او) تے بین کثیرالجہتی فورمز تے جمہوریہ کرغز دے نال نیڑے تعاون جاری رکھݨ چاہندے۔ انھاں آکھیا جو علاقائی تے عالمی پیش رفت دے بارے آپت دی مفاہمت کوں ودھارا ݙیوݨ کیتے پارلیمانی، دفاعی، سکیورٹی تے تزویراتی پالیسی دے شعبیں اچ تبادلیں دا خیرمقدم کیتا ویسی۔ ݙوہیں رہنماواں اہم علاقائی تے بین الاقوامی امور تے وی ڳالھ کیتی تے مذاکرات دے ذریعے امن، استحکام تے ترقی دے ودھارے کیتے آپݨے سانجھے عزم دا اعادہ کیتا۔ ایں موقع تے جمہوریہ کرغز دی وزارتِ صحت تے پاکستان دی ڈرگ ریگولیٹری اتھارٹی (ڈریپ) وچال ہک مفاہمتی یادداشت تے کرغز وزیرِ صحت دامیربیک عثمانوف تے پاکستان دے وزیرِ مملکت قومی صحت خدمات ڈاکٹر مختار بھرتھ دستخط کیتے۔ بعد اچ ݙوہیں صدور ایں موقع تے ہک سانجھے اعلامیہ تے وی دستخط کیتے۔ ملاقات اچ وفاقی وزیر پارلیمانی امور طارق فضل چوہدری، وزیرِ مملکت قومی صحت ڈاکٹر مختار بھرتھ، سینیٹر سلیم مانڈوی والا، ڈاکٹر عاصم حسین، صدرِ مملکت دے ترجمان مرتضیٰ سولنگی تے کرغزستان اچ پاکستان دے سفیر وی موجود ہن۔ ملاقات دے بعد کرغز صدر دے پاسوں صدرِ پاکستان دے اعزاز اچ سرکاری استقبالیہ وی ݙتا ڳیا