ماحول دوست صاف، سستی تے پائیدار توانائی کیتے شمسی توانائی دا فروغ قومی توانائی دا اہم جزو اے، 100 میگاواٹ سولر منصوبہ وفاقی حکومت دا گلگت بلتستان دے عوام کیتے تحفہ اے، وزیرِ اعظم محمد شہباز شریف

اسلام آباد۔8 جولائی (اے پی پی) وزیرِ اعظم محمد شہباز شریف آکھیا جو ماحول دوست صاف، سستی تے پائیدار توانائی کیتے شمسی توانائی دا فروغ قومی توانائی دا اہم جزو اے، 100 میگاواٹ سولر منصوبہ وفاقی حکومت ولوں گلگت بلتستان دے عوام کیتے تحفہ اے، پاور ڈویژن منصوبے دی بروقت تکمیل دے حوالے نال آپݨی ذمے واری پوری کرے۔ بدھ کوں وزیرِ اعظم آفس دے میڈیا ونگ توں جاری بیان دے مطابق وزیرِ اعظم محمد شہباز شریف دی صدارت گلگت بلتستان کیتے 100 میگا واٹ شمسی توانائی منصوبے توں متعلق جائزہ اجلاس تھیا جئیں اچ وفاقی وزیرِ پاور ڈویژن سردار اویس لغاری، وزیرِ مملکت برائے خزانہ تے ریلوے بلال اظہر کیانی تے متعلقہ اعلیٰ سرکاری افسراں شرکت کیتی۔ اجلاس کوں گلگت بلتستان شمسی توانائی منصوبے تے پیشرفت تے بریفنگ ݙتی ڳئی۔ وزیرِ اعظم محمد شہباز شریف آکھیا جو 100 میگاواٹ سولر منصوبہ وفاقی حکومت ولوں گلگت بلتستان دی عوام کیتے ہک تحفہ اے، پاور ڈویژن منصوبے دی تنصیب تے بروقت تکمیل دے حوالے نال آپݨی ذمے واری پوری کرے۔ وزیرِ اعظم ہدایت کیتی جو سولر منصوبے کیتے خریداری دے عمل اچ مکمل شفافیت یقینی بݨائی وڃے، تمام ادائیگیاں تریجھے فریق دی توثیق دے بعد کیتی ونڃن۔ اجلاس کوں ݙسایا ڳیا جو منصوبے دے تحت 499 سرکاری عمارتاں دی چھتاں تے بیٹری سٹوریج سمیت 18 میگاواٹ سولر سسٹم دسمبر 2026 تائیں نصب کر ݙتا ویسی، 82 میگاواٹ یوٹیلیٹی سکیل سولر منصوبے دا پی سی ون منظوری کیتے ایکنک کوں بھجوا ݙتا ڳئے، 82 میگاواٹ سولر منصوبے توں تقریباً 13 لکھ افراد مستفید تھیسن، منصوبے دی تکمیل نال گلگت بلتستان اچ سروس دا معیار بہتر تھیسی تے لوڈ شیڈنگ دے خاتمے اچ مدد ملسی۔