وفاقی وزیرِ داخلہ محسن نقوی تے روس دے وزیرِ داخلہ ولادیمیر الیگزینڈر ووچ کولوکولٹسیف دے وچال ملاقات، دہشت گردی تے سائبر کرائم دے خلاف مشترکہ حکمتِ عملی تے اتفاق

نیویارک۔8 جولائی (اے پی پی) اقوامِ متحدہ دے ہیڈ کوارٹر اچ وفاقی وزیرِ داخلہ محسن نقوی تے روس دے وزیرِ داخلہ ولادیمیر الیگزینڈر ووچ کولوکولٹسیف وچال ہک انتہائی اہم تے تفصیلی ملاقات تھئی اے۔ ایں اعلیٰ سطح دی ملاقات اچ ݙوہائیں رہنماواں پاک روس تعلقات کوں وقت دے تقاضیاں دے مطابق ٻئے مضبوط تے مستحکم بݨاوݨ دے پختہ عزم دا اعادہ کیتا۔ ملاقات دے دوران خطے دی مجموعی تے موجودہ امن و امان دی صورتحال سمیت آپسی دلچسپی دے معاملیاں تے ݙوہائیں ملکاں وچال تعاون کوں نویں افق ݙیوݨ تے تفصیلی ڳالھ کیتی۔ ترجمان وزارتِ داخلہ دے مطابق ملاقات اچ ݙوہائیں وزرائے داخلہ انسدادِ منشیات، انسدادِ دہشت گرڈی تے سائبر کرائم جیھے جدید چیلنجز نال نبڑݨ کیتے آپسی تعاون کوں مزید وسیع کرݨ تے اتفاق کیتا۔ ایں موقعے تے ݙوہائیں ملکاں دی پولیس وچال پیشہ ورانہ صلاحیتاں کوں نکھارݨ کیتے مشترکہ مشقاں کرواوݨ دے امور تے وی سنجیدگی نال ڳالھ مہاڑ کیتی ڳئی۔ ݙوپاسہ سکیورٹی شراکت داری کوں باضابطہ شکل ݙیوݨ کیتے ݙوہائیں وزرائے داخلہ ݙوہائیں ملکاں دی وزارتِ داخلہ دے وچال ہک جامع مفاہمتی یادداشت تے اتفاق کیتا۔ وفاقی وزیرِ داخلہ محسن نقوی آپݨے روسی ہم منصب کوں پاکستان دے سرکاری دورے دی دعوت وی ݙتی تے پچھلی میٹنگ دے فیصلیاں تے پیشرفت دا جائزہ گھدا۔ خطے دی سکیورٹی خصوصاً افغانستان دی صورتحال تے ڳالھ کریندیں ہوئیں وفاقی وزیرِ داخلہ محسن نقوی اہم حقائق توں پردہ چاتا۔ انھاں روسی ہم منصب کوں ݙسایا جو ایں ویلھے افغانستان اچ 25 توں ودھ دہشت گرڈ تنظیماں سرگرمِ عمل ہن جیہڑیاں عالمی تے علاقائی امن کیتے خطرہ ہن۔ محسن نقوی واضح کیتا جو اِنھاں انتہا پسند تنظیماں دا مکمل خاتمہ کہیں ہک ملک دا نئی بلکہ اساں ساریاں دی سانجھی ذمہ واری اے اتے وقت دا تقاضا اے جو اساں سارے رَل تے ایں ناسور کوں جڑ توں اکھاڑݨ کیتے فوری، ٹھوس تے مشترکہ اقدامات کروں۔