قائم مقام صدر سید یوسف رضا گیلانی نال مختلف سیاسی، سماجی تے عوامی شخصیات دی ملاقات

اسلام آباد۔8 جولائی (اے پی پی) قائم مقام صدر سید یوسف رضا گیلانی نال ملک دے مختلف علاقیاں توں تعلق رکھݨ آلیاں مختلف سیاسی، سماجی تے عوامی شخصیات بدھ کوں اتھاں ایوانِ صدر اچ ملاقات کیتی۔ ایوانِ صدر دے پریس ونگ توں جاری بیان دے مطابق ملاقات کرݨ آلیاں اچ میاں علمدار قریشی رکن صوبائی اسمبلی، عثمان بھٹی سابق رکن صوبائی اسمبلی، قیصر احمد گجر سابق رکن صوبائی اسمبلی، علی سید چیئرمین نیشنل انشورنس کمپنی، عثمان چوہدری (ملیشیا) چیئرمین گلوبل مسلم بزنس فورم، چوہدری عمر نثار، محمد عمران علی چیئرمین ریوائو پاکستان، سردار احمد رضا ماہرِ تعلیم، کرنل (ر) نیئر عباس، ملک منک راں، معظم علی، بیرسٹر مدثر حسین شاہ، حیدر علی، ڈاکٹر عباس نقوی، ڈاکٹر سیدین نقوی تے ٻئیاں معزز شخصیات شامل ہن۔ ملاقات دے دوران ملک دی مجموعی سیاسی، معاشی تے سماجی صورتحال، عوامی فلاح و بہبود، قومی ترقی، عوام کوں درپیش مسائل تے آپسی دلچسپی دے ٻین اہم معاملیاں تے تفصیلی ڳالھ مہاڑ کیتی ڳئی۔ ایں موقعے تے شرکا قائم مقام صدرِ مملکت سید یوسف رضا گیلانی دی قومی، سیاسی، سماجی تے عوامی خدمات کوں زبردست خراجِ عِقیدت پیش کریندیں ہوئیں ملکی ترقی، قومی یکجہتی، جمہوری اقدار دے فروغ تے عوامی بہبود کیتے انھاں دے کردار کوں سراہیا۔