خطے اچ امن و استحکام دے ودھارے کیتے پاکستان دے مثبت کردار عالمی سرمایہ کاراں دا اعتماد ودھائے، پروفیسر احسن اقبال

شکاگو۔8 جولائی (اے پی پی) وفاقی وزیرمنصوبہ بندی، ترقی و خصوصی اقدامات پروفیسر احسن اقبال پاکستانی نژاد امریکی کاروباری برادری کوں پاکستان دی معاشی ترقی، سرمایہ کاری، اختراع تے علم تے مبنی معیشت دی تعمیر اچ فعال شراکت دی دعوت ݙیندیں آکھیے جو خطے اچ امن و استحکام دے ودھارے کیتے پاکستان دے مثبت کردار عالمی سرمایہ کاراں دا اعتماد ودھائے تے تجارت، سرمایہ کاری تے بین الاقوامی شراکت داری دے نویں موقع پیدا کیتن۔ اتھاں وزارتِ منصوبہ بندی، ترقی و خصوصی اقدامات توں جاری پریس ریلیز موجب اے ڳالھ انہاں شکاگو اچ پاکستانی نژاد امریکی سرمایہ کاراں، صنعت کاراں، کاروباری شخصیات، ٹیکنالوجی ماہرین تے مالیاتی شعبے نال وابستہ ممتاز لوکاں دے ہک اعلیٰ سطحی اجلاس نال خطاب کریندیں آکھی۔ اجلاس اچ فارچیون 500 کمپنیاں دے سابق اعلیٰ عہدیداراں، مصنوعی ذہانت دے شعبے نال وابستہ ممتاز ماہرین، امریکی ٹیکنالوجی سرمایہ کاراں تے مختلف شعبہ ہائے زندگی اچ نمایاں خدمات انجام ݙیوݨ آلی پاکستانی نژاد امریکی شخصیات شرکت کیتی۔وفاقی وزیر آکھیا جو پاکستان ایں ویلھے آپݨی تاریخ دے ہک اہم موڑ تے کھڑے جتھاں قومی سلامتی، مؤثر سفارت کاری تے معاشی استحکام اچ حاصل تھیوݨ آلی کامیابیاں کوں پائیدار اقتصادی ترقی اچ تبدیل کرݨ ویلھے دی اہم لوڑھ اے۔ احسن اقبال آکھیا جو ٻاہرلے ملک رہݨ آلے پاکستانی ہمیشہ آپݨے وطن نال تکڑا رشتہ رکھیندن جڈانجو پاکستانی نژاد امریکی برادری ٹیکنالوجی، مالیات، صحت، توانائی، تعلیم تے تحقیق سودھے ہر شعبے اچ نمایاں کامیابیاں حاصل کیتن۔ انھاں آکھیا جو وزیرِاعظم شہباز شریف دی قیادت اچ حکومت اوکھے مگر ناگزیر معاشی اصلاحات دے ذریعے ملک کوں ول معاشی استحکام دی راہ تے گامزن کر ݙتے، مہانگ اچ نمایاں کمی آئی ، شرحِ سود اچ کمی ممکن بݨائی تے پاکستان کوں عالمی سطح تے معاشی بحالی دی ہک کامیاب مثال دے طور تے تسلیم کیتا ویندا پئے۔ انھاں آکھیا جو حکومت تکڑی بنیاد ݙے ݙتی ہݨ لوڑھ ایں ڳالھ دی اے جو اوورسیز پاکستانی آپݨی سرمایہ کاری، تجربے، پیشہ وارانہ رابطے تے مہارتاں دے ذریعے پاکستان دی ترقی اچ بھرپور کردار ادا کرن۔ انھاں آکھیا جو اے چنڳاں ویلھا اے جو ٻاہرلے ملک رہݨ آلے پاکستانی پاکستان کوں آپݨی سرمایہ کاری تے پیشہ وارانہ سرگرمیاں دا اہم مرکز بݨاون۔ پروفیسر احسن اقبال اجلاس دے شرکاء کوں حکومت دے قومی معاشی تبدیلی دے پروگرام ’’اڑان پاکستان‘‘ دا ݙسیندے آکھیا جو ایں پروگرام دے تحت 2035 تئیں پاکستان کوں ہک ٹریلین ڈالر تے 2047 تئیں ترائے ٹریلین ڈالر دی معیشت بݨاوݨ دا ہدف مقرر کیتا ڳئے جیں دی بنیاد فائیو ایز فریم ورک یعنی برآمدات، ای پاکستان، ماحولیات و موسمیاتی تبدیلی، توانائی و بنیادی ڈھانچہ، تے مساوات و بااختیاری تے رکھی ڳئی اے۔ انھاں آکھیا جو انفارمیشن ٹیکنالوجی، زراعت، صنعت، سیاحت، معدنیات، بلیو اکانومی، ہنرمند افرادی قوت تے تخلیقی صنعتاں پاکستان دی برآمدات اچ ودھارے کیتے ترجیحی شعبیں دی حیثیت رکھیندن ۔ وفاقی وزیر آکھیا جو حکومت سرمایہ کاری، کاروبار تے اختراع دے ودھارے کیتے سازگار ماحول ݙیوݨ کیتے پرعزم اے۔ انھاں ایں امید دا اظہار کیتا جو ٻاہرلے ملک مقیم پاکستانیاں دی فعال شمولیت توں پاکستان آپݨی معاشی منزل حاصل کریندیں ہک مضبوط، مسابقتی تے علم تے مبنی معیشت دے طور تے ابھرسی۔احسن اقبال آکھیا جو حکومت پاکستانی نژاد امریکی ماہرینِ تعلیم، محققین تے سائنسی اداریں دے نال تعاون کوں مزید وسعت ݙیوݨ کیتے کوشاں اے۔ انھاں ایں سلسلے اچ یونیورسٹی آف الینوائے شکاگو، الینوائے انسٹی ٹیوٹ آف ٹیکنالوجی، یونیورسٹی آف شکاگو تے امریکا۔پاکستان نالج کوریڈور دے تحت جاری تعاون دا ذکر کریندیں آکھیا جو مصنوعی ذہانت، جدید ٹیکنالوجی تے تحقیق دے شعبیں اچ ٻاہرلے ملک رہݨ آلے پاکستانی ماہرین دی خدمات توں فیدہ چاوݨا حکومت دی ترجیحات اچ شامل اے۔ دورہِ شکاگو دے دوران وفاقی وزیر یونیورسٹی آف شکاگو دے مختلف شعبیں دے سربراہان تے ماہرین نال انڄ انڄ ملاقاتاں وی کیتیاں، جنھاں اچ عوامی پالیسی، سرکاری شعبے اچ اصلاحات، تعلیمی نصاب، انسانی وسائل دی ترقی تے موسمیاتی تبدیلی جیھے اہم موضوعات تے تفصیلی ڳالھ مہاڑ کیتی ڳئی۔