وزیرِ خزانہ محمد اورنگزیب دی ایس ای سی پی دی کارکردگی دا جائزہ

اسلام آباد۔8 جولائی (اے پی پی) وفاقی وزیرِ خزانہ و محصولات محمد اورنگزیب آکھیے جو ریگولیٹری اداریں کوں کاروبار تے سرمایہ کاری اچ سوکھ ݙیوݨ دے نال نال مارکیٹ اچ شفاف، منصفانہ تے سازگار کاروباری ماحول کوں یقینی بݨاوݨ کیتے متعلقہ قوانین دے مؤثر نفاذ کوں وی یقینی بݨاوݨا ضروری اے، سرمایہ کاری دے ودھارے، کاروباری ترقی تے مارکیٹ دے اعتماد کوں تکڑا بݨاوݨ کیتے کاروبار دوست ریگولیٹری فریم ورک ضروری اے۔ انھاں اے ڳالھ سکیورٹیز اینڈ ایکسچینج کمیشن آف پاکستان (ایس ای سی پی) اچ کمیشن دی کارکردگی دا جائزہ گھنݨ، کیپٹل مارکیٹ کوں وسعت ݙیوݨ تے مقامی و غیر ملکی سرمایہ کاراں دی سہولت کیتے کیتیاں ونڄݨ آلیاں اصلاحات تے اجلاس دی صدارت کریندیں آکھی۔ اجلاس اچ چیئرمین ایس ای سی پی ڈاکٹر کبیر احمد سدھو، کمشنرز امتیاز ہائیڈر، محمد علی فرید خواجہ، مظفر احمد مرزا تے ذیشان رحمان خٹک سودھے سینئر حکام شرکت کیتی۔ وزیرِ خزانہ دے مشیر خرم شہزاد تے عمر ایم خان وی اجلاس اچ موجود ہن۔ڈاکٹر کبیر احمد سدھو وزیرِ خزانہ کوں ایس ای سی پی دی کارکردگی تے بریفنگ ݙتی۔ انھاں ݙسایا جو گزریل چھی مہینے اچ ریکارڈ 18,057 نویاں کمپنیاں دی رجسٹریشن کیتی ڳئی، 149 نویاں نان بینکنگ فنانس کمپنیاں کوں مختلف سروسز ݙیوݨ دے لائسنسز جاری کیتے ڳئن تے سندھ اچ تھرڈ پارٹی موٹر انشورنس دے کامیاب نفاذ دے بعد صرف ترئے مہینے اچ تھرڈ پارٹی موٹر انشورنس اچ 1,300 فیصد ودھارا تھیا۔ انھاں ݙسایا جو ایں سال جنوری توں جون تئیں صرف چھی ماہ اچ پاکستان سٹاک ایکسچینج اچ 10 ابتدائی عوامی پیشکشاں (آئی پی اوز) تھئے تے ایں دوران سٹاک مارکیٹ اچ 127,907 نویں سرمایہ کاراں دا ودھارا تھیا، جیں نال سرمایہ کاراں دی مجموعی تعداد 583,052 توں تجاوز کر ڳئی اے۔ ایس ای سی پی دی سپروژن تے انفورسمنٹ دیاں سرگرمیاں دا ݙسایا ڳیا جو ایں دوران کمیشن 75 انسپکشن رپورٹس تے 13 تحقیقات مکمل کیتیاں، رولز تے ریگولیشنز دی نان کمپلائنس کرݨ آلیاں کمپنیاں تے سرکاری ملکیتی اداریں کوں 534 شوکاز نوٹسز جاری کیتے ڳئن۔مالیاتی فراڈ تے غیر قانونی ڈیپازٹ گھنݨ دے خلاف کارروائیاں کریندیں 397 فیصلے جاری کیتے جِنھاں دے نتیجے اچ 2 کروڑ روپے توں ودھ جرمانے فیڈرل کنسولیڈیٹڈ فنڈ اچ جمع کرائے ڳئے۔ وزیرِ خزانہ محمد اورنگزیب سرکاری ملکیتی اداریں اچ گورننس بہتر بݨاوݨ کیتے ایس ای سی پی دے اقدامات دی تعریف کیتی جیڑھے متعلقہ وزارتاں دے پرنسپل اکاؤنٹنگ افسران کوں عدم تعمیل دے معاملات دا ݙسیا ونڄے تاں جو اصلاحی اقدامات کیتے ونڄ سڳن۔ وزیرِ خزانہ کمپنی رجسٹریشن، لائسنسنگ تے پبلک آفرنگ دے عمل کوں مزید سوکھا بݨاوݨ، ڈیجیٹلائزیشن کوں ودھاوݨ تے انسانی مداخلت گھٹ کرݨ تے زور ݙتا تانجو کاروباری سرگرمیاں، نویں لسٹنگز تے سرمایہ کاری کوں ودھایا ونڄ سڳے۔ ڈاکٹر کبیر سدھو وزیرِ خزانہ کوں سرمایہ کاراں دی کے وائے سی کیتے آئی بین بیسڈ سسٹم دے نفاذ، مارکیٹ اچ سرمایہ کاری کیتے ’آسان کنیکٹ‘ دی ایپ تے بروکر ریفرل پروگرام تے وی بریفنگ ݙتی