سرحد پار توں آوݨ آلی دہشت گردی کوں ریاست دی پوری طاقت نال کُچل ݙتا ویسی، مسلح افواج قوم دی مکمل حمایت نال پراکسی دہشت گرداں دے ٹھکاݨے تے انھاں دے سہولت کاراں دا مکمل خاتمہ یقینی بݨیسی، فیلڈ مارشل سید عاصم منیر

راولپنڈی۔8 جولائی (اے پی پی) چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر ایں عزم دا اعادہ کیتے جو سرحد پار توں آوݨ آلی دہشت گردی کوں ریاست دی پوری طاقت نال کُچل ݙتا ویسی۔ مسلح افواج قوم دی مکمل حمایت نال اِنھاں پراکسی دہشت گرداں دے ٹھکاݨیں تے انھاں دے سہولت کاراں دا مکمل خاتمہ یقینی بݨیسی۔ پاک فوج دے شعبہِ تعلقاتِ عامہ (آئی ایس پی آر) توں جاری بیان موجب چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر نیشنل ڈیفنس یونیورسٹی (این ڈی یو) اسلام آباد دا دورہ کیتا جتھاں انھاں نیشنل سکیورٹی اینڈ وار کورس دے فارغ التحصیل افسران نال خطاب کیتا۔ ایں کورس اچ ترائی مسلح افواج دے افسر شریک ہن۔ آپݨے خطاب اچ فیلڈ مارشل سید عاصم منیر جنگ دی بدلدی نوعیت تے روشنی پیندیں آکھیا جو اوکھے تذویراتی چیلنجز نال مؤثر انداز اچ نبٹݨ کیتے واضح سٹریٹجک سوچ تے ادارہ جاتی پیشہ ورانہ مہارت بنیادی اہمیت رکھیندی اے۔ انھاں نیشنل ڈیفنس یونیورسٹی جیھے اعلیٰ تعلیمی اداریں دے کردار کوں چنڳاں اکھیندے آکھیے اے ادارے مستقبل دی عسکری و سول قیادت کوں ایجھی صلاحیتاں نال آراستہ کریندے پئن جیڑھیاں ہائبرڈ، روایتی تے ذیلی روایتی خطرات دا بصیرت، اعتماد تے عزم دے نال مقابلہ کر سڳن۔انھاں آکھیا جو پاکستان دی مسلح افواج جنگ دی بدلدی نوعیت موجب آپݨی حکمتِ عملی، صلاحیتاں تے آپریشنل طریقہِ کار کوں نویں سِروں ترتیب ݙیندیاں پئن۔ انھاں آکھیا جو مسلح افواج ریاستی سرپرستی اچ کم کرݨ آلی اِنھاں دشمن انٹیلی جینس ایجنسیاں دی پاکستان کوں غیر مستحکم کرݨ دیاں کوششاں توں مکمل طور تے آگاہ ہن۔ اِنھاں دشمن ایجنسیاں دی سرپرستی اچ کم کرݨ آلے نیٹ ورکس تے پراکسی عناصر دیاں ساریاں کوششاں ناکام ہوسن تے انھاں کوں پاکستان دے داخلی امن تے معاشی خوشحالی کوں ضیان پڄاوݨ دی اصلوں اجازت نئی ݙتی ونڄݨی۔ فیلڈ مارشل ایں عزم دا اعادہ کیتا جو سرحد پار توں آوݨ آلی دہشت گردی کوں ریاست دی پوری طاقت نال کُچل ݙتا ویسی۔ انھاں آکھیا جو مسلح افواج قوم دی مکمل حمایت نال اِنھاں پراکسی دہشت گرداں دے ٹھکاݨیں تے انھاں دے سہولت کاراں دا مکمل خاتمہ یقینی بݨیسن۔ انھاں آکھیا جو جنگاں میڈیا دے شور و غوغے یا سیاسی نعریں نال نی بلکہ ایمان، اتحاد تے نظم و ضبط نال جتیاں ویندن۔آپݨے خطاب دے چھیکڑ تے فیلڈ مارشل پاکستان دی جنگی تجربہ رکھݨ آلی مسلح افواج دی پیشہ ورانہ صلاحیت، اُچے حوصلے تے مکمل آپریشنل تیاری تے بھرپور اعتماد دا اظہار کیتا۔ انھاں فارغ التحصیل افسراں تے زور ݙتا جو او دیانت داری، بے لوث خدمت تے وطن توں غیر متزلزل وابستگی جیھاں اعلیٰ اقدار کوں ہمیشہ مقدم رکھن۔ نیشنل ڈیفنس یونیورسٹی پُڄݨ تے فیلڈ مارشل سید عاصم منیر دا استقبال صدر نیشنل ڈیفنس یونیورسٹی کیتا۔