عالمی چیلنجز نال کلھیں نبڑݨ ممکن نہیں، ماورائے سرحد جرائم دے خاتمے کیتے فوری روابط تے ٹیکنالوجی دا سانجھ ضروری اے، وفاقی وزیرِ داخلہ محسن نقوی

نیویارک۔9 جولائی (اے پی پی) وفاقی وزیرِ داخلہ محسن نقوی آکھیا جو عالمی چیلنجز نال کلھیں نبڑݨ ممکن نہیں، ماورائے سرحد جرائم دے خاتمے کیتے فوری روابط تے ٹیکنالوجی دا سانجھ ضروری اے۔ اقوامِ متحدہ دی پولیس سربراہان دی سمٹ (یو این سی او پی ایس) توں تاریخی تے کلیدی خطاب کریندیں ہوئیں انھاں عالمی برادری تے زور ݙتا جو دہشت گردی، منظم جرائم تے سائبر کرائمز دے خاتمے کیتے بین الاقوامی تعاون، آپسی اعتماد تے فوری معلومات دا تبادلہ ہݨ پہلے توں کہیں ودھ ضروری تھی ڳئے۔ اقوامِ متحدہ دے صدر دفتر نیویارک اچ تھیوݨ آلے ایں اعلیٰ سطحی عالمی فورم اچ دنیا بھر توں آئے ہوئے وزراء، پولیس چیفس تے معزز شخصیات دا خیرمقدم کریندیں ہوئیں وزیرِ داخلہ محسن نقوی خطبہِ استقبالیہ دے بعد آپݨے عزم دا اظہار کیتا۔ انھاں آکھیا جو اڄ دنیا کوں جنھاں چیلنجز دا سامݨا اے، او قومی سرحداں کوں نہیں منیندے۔ دہشت گردی، منظم جرائم، سائبر کرائم، منشیات تے انسانی اسمگلنگ دے نال نال منی لانڈرنگ سویں ناسور توں دنیا دا ہر ملک متاثر تھیندا پئے۔ کوئی وی ملک اِنھاں خطرات توں محفوظ نہیں، ایں کیتے قانون نافذ کرݨ آلے اداریاں وچال مضبوط شراکت داری دا قیام وقت دی اہم ترین لوڑھ اے۔ وفاقی وزیرِ داخلہ جدید دور دے تقاضیاں تے روشنی پیندیں ہوئیں آکھیا جو ٹیکنالوجی انتہائی تیز رفتاری نال بدلدی پئی اے اتے جرائم پیشہ عناصر جرائم دی نویاں تے جدید تکنیکاں استعمال کریندے پئن۔ اساکوں انھاں دا مقابلہ کرݨ تے انھاں دی روک تھام کیتے خود جدید ترین ٹیکنالوجی کوں اپناوݨا ہوسی۔ انھاں ایں ڳالھ تے زور ݙتا جو اساکوں آپݨے پولیس افسراں دی پیشہ ورانہ صلاحیتاں کوں عالمی معیار دے مطابق بہتر بݨاوݨا اے۔ فورسز دی تربیت دے نظام کوں مضبوط کر تے ایں اچ جدت دا زیادہ توں زیادہ استعمال یقینی بݨاوݨا ہوسی۔ محسن نقوی سمٹ اچ موجود عالمی رہنماواں دے تجربے کوں سراہیندیں ہوئیں آکھیا جو ایں سیشن اچ دنیا بھر دے تجربہ کار تے مایہ ناز سکیورٹی ماہرین کٹھے ہن۔ تساں اچوں ہر ہک قیمتی علم تے عملی تجربہ رکھیند ، لہذا اساکوں ہک ٻئے دے خیالات تے کامیابیاں توں سکھݨا چاہیدے اتے رَل تے کم کرݨ دے نویں رستے تلاش کرݨے چاہیدن۔ وزیرِ داخلہ اے موقع فراہم کرݨ تے اقوامِ متحدہ دے پولیس ایڈوائزر فیصل شاکر دا خصوصی شکریہ ادا کیتا جنھاں دی بدولت عالمی ہم منصوبیاں تے دوستاں کوں ہک ٻئے نال ملݨ تے مکالمہ کرݨ دا موقع ملیا۔ انھاں آکھیا جو اقوامِ متحدہ اساکوں ہک ایجھا منفرد پلیٹ فارم مہیا کریندے جیہڑا اساکوں آپݨے ملک کوں محفوظ بݨاوݨ دے مشترکہ مقصد دے تحت یکجا کریندے۔ آپݨے خطاب دے اختتام تے وزیرِ داخلہ محسن نقوی دا آکھݨ ہئی جو اے سمٹ آپݨے لوکاں دی حفاظت تے دنیا بھر اچ امن و سلامتی دے قیام کوں مضبوط بݨاوݨ دے حوالے توں انتہائی خاص تے سنگِ میل دی حیثیت رکھیندی اے۔