چین-پاکستان اقتصادی راہداری علاقائی روابط تے معاشی ترقی دا اہم محرک اے، قائم مقام صدر دا سیمینار نال خطاب

اسلام آباد۔9 جولائی (اے پی پی) قائم مقام صدر سید یوسف رضا گیلانی چین پاکستان اقتصادی راہداری (سی پیک) کوں علاقائی روابط تے معاشی ترقی دا اہم محرک قرار ݙیندیں ہوئیں آکھیا جو ݙوہیں ممالک وچال تجارت، ٹیکنالوجی، صاف توانائی تے پارلیمانی روابط دے شعبیاں اچ تعاون کوں مزید فروغ ݙیوݨ دے وسیع امکانات موجود ہن۔ اے ڳالھیں انہاں خمیس کوں اتھاں پاکستان چائنا اکنامک اینڈ کلچرل کونسل ولوں سیمینار توں خطاب کریندیں ہوئیں کیتا جیہڑا چین دی کمیونسٹ پارٹی دے قیام دی 105ویں سالگرہ دی مناسبت نال کیتا ڳیا ہئی۔ سیمینار اچ ملک دی اہم سیاسی شخصیات، ارکانِ پارلیمنٹ، سفارتکاراں، پالیسی ماہرین تے چین دے سفیر سمیت سفارتخانے دے نمائندیاں شرکت کیتی۔ مقررین چین دے صدر شی جن پنگ دے پارٹی دی تعمیر بارے نظریے دی عالمی اہمیت تے دیرینہ پاک۔چین شراکت داری تے ڳالھ کیتی۔ سیمینار توں خطاب کریندیں ہوئیں قائم مقام صدر آکھیا جو پاک۔چین تعاون دفاع، تجارت، بنیادی ڈھانچے، تعلیم، صحت تے ثقافتی تبادلیاں سمیت مختلف شعبیاں تائیں کھنڈ ڳئے۔ سید یوسف رضا گیلانی آکھیا جو کمیونسٹ پارٹی آف چائنا دی قیادت اچ چین دی شاندار ترقی مضبوط اداریاں، طویل المدتی منصوبہ بندی تے مؤثر طرزِ حکمرانی دی اہمیت کوں ظاہر کریندی اے۔ انھاں آکھیا جو کمیونسٹ پارٹی آف چائنا ہک صدی توں زائد عرصے دے دوران غیر معمولی ادارہ جاتی مضبوطی دا مظاہرہ کیتا جئیں دے نتیجے اچ چین ے بے مثال معاشی تبدیلی حاصل کیتی تے ایں نے کروڑاں لوکاں کوں غربت توں کڈھیا۔ انھاں آکھیا جو اے کامیابیاں عالمی ترقی اچ نمایاں کردار دی حامل ہن۔ پاک۔چین دیرینہ دوستی دا اعادہ کریندیں ہوئیں قائم مقام صدر ایں تعلق کوں باہمی اعتماد، مشترکہ مفادات تے تزویراتی تعاون تے مبنی آہنی بھائی چارہ قرار ݙتا۔  انھاں سیمینار دے انعقاد تے منتظمین کوں مبارکباد ݙتی تے پاکستان دے عوام ولوں کمیونسٹ پارٹی آف چائنا تے چین دی عوام کوں پارٹی دے قیام دی 105ویں سالگرہ تے دلی مبارکباد پیش کیتی۔ سیمینار توں گورنر خیبر پختونخوا فیصل کریم کنڈی، سپیکر خیبر پختونخوا اسمبلی بابر سلیم سواتی، چین دے سفیر جیانگ زیڈونگ تے پاکستان۔چین اقتصادی تے ثقافتی کونسل دے صدر بایزید برہان اللہ کانسی وی خطاب کیتا۔سیمینار توں خطاب کریندیں ہوئیں گورنر خیبر پختونخوا فیصل کریم کنڈی آکھیا جو پاکستان تے چین دا باہمی تعلق دو حکومتاں دے وچال نہیں بلکہ عوام دا رشتہ اے۔ انھاں آکھیا جو پاکستان تے چین دی دوستی وقت گزرݨ دے نال مزید مضبوط تھیندی پئی اے۔ پاکستان اچ چین دے سفیر جیانگ زیڈونگ آکھیا جو گزشتہ 105 سال دے دوران کمیونسٹ پارٹی آف چائنا دی شاندار کامیابیاں ترقی، جدیدیت تے عوام دی زندگیاں کوں بہتر بݨاوݨ کیتے ایں دے عزم دی عکاس ہن۔ چینی سفیر صدر آصف علی زرداری، وزیرِاعظم محمد شہباز شریف تے قائم مقام صدر سید یوسف رضا گیلانی دی قیادت کوں سراہیندیں ہوئیں آکھیا جو پاکستان نے معاشی بحالی تے قومی ترقی اچ نمایاں پیشرفت کیتی اے۔  پاکستان۔چائنا اکنامک اینڈ کلچرل کونسل دے صدر بایزید برہان اللہ کانسی وی ایں موقعے تے خطاب کیتا۔ سیمینار اچ کمیونسٹ پارٹی آف چائنا دی تاریخ تے ترقی کوں اجاگر کرݨ کیتے دستاویزی فلم وی ݙکھائی ڳئی۔