قائم مقام صدر سید یوسف رضا گیلانی نال کروشیا دے وزیر برائے خارجہ امور دی ایوانِ صدر اچ ملاقات

اسلام آباد۔9 جولائی (اے پی پی) قائم مقام صدر سید یوسف رضا گیلانی نال جمہوریہ کروشیا دے وزیر برائے خارجہ تے یورپی امور ڈاکٹر گورڈن گرلیچ ریڈمین خمیس کوں اتھاں ایوانِ صدر اچ ملاقات کیتی۔ ایوانِ صدر دے پریس ونگ توں جاری بیان دے مطابق قائم مقام صدر کروشیا دے وزیرِ خارجہ تے انھاں دے وفد دا خیرمقدم کریندیں ہوئیں آکھیا جو کروشیا دے وزیرِ خارجہ دا پاکستان دا پہلا دورہ ݙوپاسہ تعلقات اچ ہک تاریخی سنگِ میل اے۔ انھاں آکھیا جو پاکستان کروشیا دے نال آپسی احترام تے خیرسگالی تے مبنی دیرینہ دوستی کوں ٻہوں اہمیت ݙیندے۔ انھاں ایں اعتماد دا اظہار کیتا جو اے دورہ ݙوپاسہ تعاون کوں نویں تحریک فراہم کریسی۔ قائم مقام صدر گزشتہ ترائے ݙہاکیاں دے دوران کروشیا دی نمایاں ترقی کوں سراہیندیں ہوئیں یورپی یونین تے نیٹو دے رکن دی حیثیت نال یورپ تے ایں توں ٻاہر ایں دے اہم کردار دی تعریف کیتی۔ انھاں آکھیا جو پاکستان کروشیا دے نال ݙوپاسہ سطح تے تے یورپی یونین دے نال پاکستان دی شراکت داری دے وسیع تر دائرہِ کار اچ آپݨے روابط کوں ٻیا مضبوط بݨاوݨ کیتے پرعزم اے۔ سید یوسف رضا گیلانی ݙوہیں ممالک وچال ݙوپاسہ تجارت تے سرمایہ کاری اچ نمایاں اضافے دی ضرورت تے زور ݙیندیں ہوئیں آکھیا جو موجودہ تجارتی حجم ݙوہیں ملکاں دی معیشتاں دی حقیقی صلاحیت توں ٻہوں ڳھٹ اے۔ انھاں پاکستان اچ کروشین کمپنیاں دی ودھدی ہوئی موجودگی دا خیرمقدم کیتا جنھاں اچ انفوبِپ دی معروف پاکستانی کاروباری اداروں دے نال شراکت داری تے کونچار دا چشمہ ہائیڈرو پاور منصوبے اچ کردار شامل اے۔ قائم مقام صدر ہنرمند پاکستانی پیشہ ور افراد دی نقل و حرکت کوں آسان بݨاوݨ خصوصاً تعمیرات، ٹرانسپورٹ تے مہمان نوازی دے شعبیاں دی اہمیت دا وی ذکر کیتا۔  کروشیا دے وزیرِ خارجہ قائم مقام صدر ولوں آپݨے تے آپݨے وفد دے پرتپاک استقبال تے مہمان نوازی تے شکریہ ادا کیتا۔ انھاں پاکستان دے نال شراکت داری کوں مزید مضبوط بݨاوݨ کیتے کروشیا دے عزم دا اعادہ کیتا تے ایں اعتماد دا اظہار کیتا جو بہتر سیاسی مکالمہ، پارلیمانی تبادلے تے اقتصادی تعاون ݙوہیں ملکاں دے دوستانہ تعلقات کوں مزید گہرا کریسن۔ ݙوہیں فریقاں آپسی دلچسپی دے تمام شعبیاں اچ پاکستان۔کروشیا تعلقات دی مکمل صلاحیت کوں بروئے کار گھن آوݨ کیتے باقاعدہ اعلیٰ سطح دے روابط برقرار رکھݨ تے مشترکہ کوششاں جاری رکھݨ دے عزم دا اعادہ کیتا۔ ملاقات اچ سیکریٹری خارجہ وی شریک ہن۔