پاکستان ساریں توں مقدم اے، سیاسی اختلافات توں بالاتر تھی تے قومی مفاد کوں ترجیح ݙیوݨی ہوسی، وفاقی وزیر پروفیسر احسن اقبال

سان فرانسسکو۔9 جولائی (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو پاکستان ساریں توں مقدم اے، سیاسی اختلافات توں بالاتر تھی تے قومی مفاد کوں ترجیح ݙیوݨی ہوسی، اوورسیز پاکستانی 2035 تئیں ہک ٹریلین ڈالر معیشت دے ہدف اچ کلیدی کردار ادا کرن۔ اتھاں جاری پریس ریلیز موجب شمالی کیلیفورنیا اچ رہݨ آلی پاکستانی برادری دے اعزاز اچ منعقدہ تعارفی ناشتے دی نشست توں خطاب کریندیں انھاں آکھیا جو اساݙی اصل شناخت کہیں جماعت نال نی بلکہ پاکستان نال اے، ٻاہرلے ملک رہݨ آلے پاکستانی ہک پرچم تلے متحد تھی تے ملک دا مثبت تشخص اجاگر کرن۔ انھاں آکھیا جو اوورسیز پاکستانی برآمدات دے سفیر بݨن، سرمایہ کاری، علم تے ٹیکنالوجی دے ذریعے وطن دی ترقی اچ حصہ پاون تے 2035 تئیں ہک ٹریلین ڈالر معیشت دے ہدف دے حصول اچ کلیدی نبھاون۔وفاقی وزیر آکھیا جو پاکستان دی معاشی خودمختاری دا انحصار برآمدات اچ غیر معمولی ودھارے تے ہے، 2035 تئیں 100 ارب ڈالر توں ودھ برآمدات دا ہدف قومی معاشی خودمختاری دی ضمانت اے۔ انھاں آکھیا جو امریکہ پاکستان دی ساریں توں وݙی برآمدی منڈی اے تے اوورسیز پاکستانی مضبوط تجارتی پل بݨ سڳدن، اڑان پاکستان دا مقصد پاکستان کوں پائیدار تے علم تے مبنی معیشت بݨاوݨ اے۔ وفاقی وزیر آکھیا جو نوجواناں کوں جدید ڈیجیٹل مہارتاں نال آراستہ کرݨ حکومت دی اولین ترجیح اے، حکومت پاکستان کوں مصنوعی ذہانت (اے آئی) تے جدید ٹیکنالوجی دے عالمی انقلاب کیتے تیار کریندی پئی اے، قومی مرکز اے آئی، سائبر سکیورٹی، بگ ڈیٹا، روبوٹکس تے جینومکس مستقبل دی معیشت دی بنیاد ہن۔انھاں آکھیا جو پاکستان اچ قومی مرکز کوانٹم کمپیوٹنگ قائم کیتا ویندا پئے، امریکہ پاکستان نالج کوریڈور دے ذریعے عالمی معیار دی انسانی صلاحیتاں تیار کیتیاں ویندیاں پئن، دنیا دی ممتاز جامعات دے نال شراکت داری پاکستان دی ترقی کوں نویں رفتار ݙیسی۔ انھاں آکھیا جو اوورسیز پاکستانی آپݨی صلاحیت، تجربے، سرمایہ کاری تے عالمی رابطے نال قومی ترقی اچ مؤثر کردار ادا کرن، ہر پاکستانی اڑان پاکستان دے قومی مشن اچ آپݨا کردار ادا کرے، دنیا اساکوں سیاسی وابستگیاں نال نی بلکہ پاکستانی شناخت نال سنڄڑیندی اے، پاکستان دا وقار تے مثبت تشخص اساں ساریں دی سانجھی ذمہ واری اے، ٹیم پاکستان دے جذبے دے نال متحد تھی تے ہی ترقی تے خوشحالی دا خواب پورا کیتا ونڄ سڳدے، اڑان پاکستان دے تحت برآمدات، جدت، جدید ٹیکنالوجی تے انسانی وسائل دی ترقی کوں قومی ترجیح ݙتی ویندی پئی اے۔ ایں موقع تے شمالی کیلیفورنیا دی پاکستانی برادری پاکستان دی ترقی کیتے سرمایہ کاری، علم تے ٹیکنالوجی تعاون ودھاوݨ دے عزم دا اظہار کیتا۔ تقریب دے شرکاء ”پاکستان ساریں توں مقدم“ دے سنھیے دی تعریف کیتی تے قومی ترقی اچ شراکت داری دے عزم دا اعادہ کیتا۔