پاکستان تے کروشیا دا سیاسی تے اقتصادی تعلقات اچ مزید رفتار پیدا کرݨ کیتے پکےاقدامات کرݨ تے اتفاق، نائب وزیرِاعظم اسحاق ڈار دی کروشیا دے وزیرِ خارجہ ڈاکٹر گورڈن گرلیچ ریڈمین دے رلے سانجھی پریس کانفرنس

اسلام آباد۔9 جولائی (اے پی پی) پاکستان تے کروشیا ایں ڳالھ تے اتفاق کیتے جو ݙوہیں ملکاں وچال سیاسی تے اقتصادی تعلقات اچ مزید رفتار پیدا کرݨ کیتے پکےاقدامات کیتے ویسن۔ ݙوہیں ملکاں تجارت، سرمایہ کاری، بنیادی ڈھانچے تے ویزا سہولت سودھے سانجھی دلچسپی دے وسیع شعبیں اچ تعاون ودھاوݨ تے اتفاق کیتا۔ اے اتفاقِ رائے نائب وزیرِاعظم تے وزیرِخارجہ سینیٹر محمد اسحاق ڈار تے پاکستان دے دورے تے آئے کروشیا دے وزیرخارجہ و یورپی امور ڈاکٹر گورڈن گرلیچ ریڈمین دے وچال اتھاں وفد دی سطح دے مذاکرات دے دوران تھیا۔ سانجھی پریس کانفرنس توں خطاب کریندیں نائب وزیرِاعظم اسحاق ڈار آکھیا جو ݙوہیں رہنماواں پاکستان-کروشیا تعلقات دے سارے پہلوواں دا جائزہ ڳھدے تے سیاسی و اقتصادی رابطے مزید مستحکم کرݨ کیتے اقدامات کرݨ تے اتفاق کیتا۔انھاں آکھیا جو ݙوہیں ملکاں تجارت، سرمایہ کاری، ترقی، زراعت، افرادی قوت دی موبائلٹی، ویزا سہولت، تعلیم، دفاع، موسمیاتی تبدیلی، سیاحت، بنیادی ڈھانچے، انفارمیشن ٹیکنالوجی تے بندرگاہواں دے تعاون سودھے سارے سانجھی دلچسپی دے شعبیں اچ تعاون ودھیسن۔ اے کروشیا دے کہیں وزیرِ خارجہ دا پاکستان دا پہلا سرکاری دورہ اے جیڑھا ݙوہیں ملکاں دے سفارتی تعلقات دی تاریخ اچ ہک نویں باب دا آغاز اے۔ نائب وزیرِاعظم آکھیا جو ݙوطرفہ تجارت اڄاں آپݨی حقیقی صلاحیت توں گھٹ اے تانجو تجارتی حجم اچ ودھارے دا رجحان اے۔ انھاں آکھیا جو ݙوہیں ملکاں اقتصادی تعلقات کوں ول فعال بݨاوݨ تے اتفاق کیتے جیں اچ مشترکہ مفاد کیتے کاروباری اداریں دے وچال رابطے کوں ودھارا ݙیوݨ وی شامل اے۔ انھاں آکھیا جو ݙوہیں ملکاں دے نجی شعبیں تے کاروباری برادریاں کوں نیڑے گھن آوݨ کیتے مستقبل اچ بزنس ٹو بزنس تجارتی فورم دے انعقاد دے منصوبے تے وی غور کیتا ڳیا۔نائب وزیرِاعظم آکھیا جو فریقین ݙوطرفہ سیاسی مشاورت متعلق مفاہمت دی یادداشت کوں مکمل طور تے فعال بݨاوݨ دا فیصلہ کیتے جݙاں جو ایں مشاورت دا پہلا دور اڄوکے سال یا 2027ء دے آغاز اچ منعقد کیتا ونڄ سڳدے۔ ݙوہیں رہنماواں اسلام آباد اچ کروشیا دے ویزا پراسیسنگ مرکز دے قیام کیتے سانجھیاں کوششاں تکھی کرݨ دا اعلان کیتا۔ ایں ویلھے پاکستانی درخواست گزاراں کوں ویزا پراسیسنگ کیتے ایران ونڄݨاں پوندے۔ کروشیا دے وزیرِ خارجہ آکھیا جو کروشیا عوامی رابطے کوں ٻہوں اہمیت ݙیندے تے چاہندے جو پاکستانی شہری پاکستان اچ ہی ویزا درخواستاں جمع کراسڳن تاں جو انھاں کوں ٻاہرلے ملک سفر نہ کرݨا پووے۔ انھاں آکھیا جو کروشیا وقتی اے سہولت قائم کرݨ چاہندے۔ نائب وزیرِاعظم انسانی اسمگلنگ تے غیر قانونی نقل مکانی دے خاتمے دی لوڑھ تے زور ݙیندیں آکھیا جو محفوظ، منظم تے قانونی طریقہِ کار دے ذریعے موقع ݙیوݨ ضروری اے تانڄو تارکینِ وطن دے حقوق تے زندگیاں دا تحفظ کیتا ونڄ سڳے تے اسمگلنگ دے غیر قانونی نیٹ ورکس دا خاتمہ تھیوے۔انھاں ݙوہیں ملکاں دے تذویراتی جغرافیائی محلِ وقوع دا ذکر کریندیں کروشین وفد کوں کراچی بندرگاہ دی استعداد، سہولتاں تے رابطہ کاری دے بارے ݙسایا تے ݙوہیں ملکاں دیاں بندرگاہواں وچال تعاون تے ڳالھ مہاڑ دا آغاز کیتا۔ مذاکرات دے دوران نائب وزیرِاعظم کروشین وفد کوں پراݨے جھیڑا جموں و کشمیر تے غزہ اچ جاری صورتحال دا ݙسایا تے تجویز ݙتی جو نیویارک اچ آندے اقوامِ متحدہ دی جنرل اسمبلی دے اجلاس اچ امن کوششاں کوں ول فعال کیتا ونڄے۔ انھاں سندھ طاس معاہدے کوں یکطرفہ طور تے معطل رکھݨ دے بھارتی اقدام تے وی تشویش دا اظہار کیتا تے دوست ملکاں توں پاݨی کوں ہتھیار بݨاوݨ دے عمل دے خاتمے اچ کردار ادا کرݨ دی اپیل کیتی۔ انھاں کروشین وفد کوں افغانستان توں سرگرم دہشت گرد نیٹ ورکس جنھاں اچ ٹی ٹی پی تے بی ایل اے شامل ہن، توں درپیش سکیورٹی چیلنجز دا وی ݙسائے ۔ انھاں زور ݙتا جو افغان طالبان حکومت آپݨی بین الاقوامی ذمہ واریاں تے عمل کرے تے افغان سرزمین کہیں ٻئے ملک، خصوصاً پاکستان دے خلاف دہشت گردی کیتے استعمال نہ تھیوݨ ݙیوے۔ݙوہیں فریقاں یوکرین دی صورتحال تے وی الوائے تے بین الاقوامی قانون موجب جھیڑیں دے حل دی لوڑھ تے زور ݙتا۔ نائب وزیرِاعظم آکھیا جو پاکستان کیتے یورپی یونین دی جی ایس پی پلس سکیم پاکستان-یورپی یونین اقتصادی تعاون دا ہک اہم ستون اے۔ انھاں آکھیا جو نواں جی ایس پی پلس ضابطہ یکم جنوری 2027 توں نافذ العمل تھیوݨ آلا اے، پاکستان 2027ء دے آغاز اچ ول درخواست ݙیوݨ کیتے تیاری دا عمل شروع کر ݙتے۔ کروشین وزیرِ خارجہ آکھیا جو جی ایس پی پلس پاکستان دے عالمی معیشت اچ انضمام کیتے ہک محرک دا کردار ادا کریندی پئی اے۔ انھاں پاکستانی کمپنیاں کوں کروشیا اچ سرمایہ کاری دی دعوت ݙیندیں آکھیا جو بہترین جغرافیائی محلِ وقوع پاروں کروشیا ہک توانائی مرکز بݨ چکئے تے یورپی منڈی کیتے ہک کھلا دروازہ اے۔ انھاں پاکستان اچ کروشین کمپنیاں دی طویل موجودگی دا ذکر کریندیں امید ظاہر کیتی جو دواسازی، صحت، آئی ٹی تے سیاحت دے شعبیں اچ مارکیٹ اچ مزید توسیع تھیسی۔ انھاں آکھیا جو نو سٹریٹجک ہوائی اݙیں تے چھی وݙیاں سمندری بندرگاہواں دے نال کروشیا بین الاقوامی سفر تے تجارت کیتے ہک گیٹ وے وی بݨ سڳدے۔ انھاں آکھیا جو وسطی یورپ دے نال کروشیا دے ریلوے رابطے مضبوط نقل و حمل، توانائی تے ڈیجیٹل رابطہ دے نیٹ ورکس کوں ودھارا ݙیندن۔ݙوہیں ملکاں اہم عالمی معاملات تے مضبوط ہم آہنگی دا اظہار کریندیں کثیرالجہتی نظام، اقوامِ متحدہ دے چارٹر تے جھیڑیں دے پرامن حل دے عزم دا اعادہ کیتا۔ کروشین وزیرِ خارجہ اقوامِ متحدہ دی سلامتی کونسل اچ پاکستان دے فعال کردار دا خیرمقدم کیتا تے اڄوکی سفارتی کوششاں دی تعریف کیتی ۔ انھاں آکھیا جو اساں بالخصوص پاکستان دیاں اِنھاں سفارتی کوششاں دی تعریف کریندوں جنھاں دے نتیجے اچ امریکہ تے ایران وچال جھیڑا مکاوݨ کیتے اسلام آباد مفاہمتی یادداشت سامݨے آئی۔ اسلام آباد کوں ”امن تے سفارت کاری دا شہر“ قرار ݙیندیں کروشین وزیرِ خارجہ نائب وزیرِاعظم محمد اسحاق ڈار دا پرتپاک استقبال تے مہمان نوازی تے شکریہ ادا کیتا۔ انھاں امید ظاہر کیتی جو انھاں دا دورہ ݙوہیں ملکاں دے تعلقات کوں مزید تکڑا بݨاوݨ، تجارت و سرمایہ کاری ودھاوݨ تے تعاون دے نویں رستے ڳولݨ اچ مددگار ثابت تھیسی۔ کروشین وزیرِ خارجہ نے نائب وزیرِاعظم اسحاق ڈار کوں آندے سال جون دے چھیکڑ تے کروشیا اچ منعقد تھیوݨ آلے ڈوبروونک فورم اچ شرکت دی سرکاری دعوت وی ݙتی۔