موسمیاتی تبدیلیاں پاروں ہیٹ ویو تے حبس دی صورتحال ودھݨ دا خدشہ اے، پی ڈی ایم اے پنجاب

لاہور۔10 جولائی (اے پی پی) پی ڈی ایم اے پنجاب آکھیا اے جو موسمیاتی تبدیلیاں پاروں ہیٹ ویو تے حبس دی صورتحال اچ اضافے دا خدشہ اے، وزیرِاعلیٰ پنجاب مریم نواز شریف دی ہدایات دے تحت ممکنہ متاثرہ اضلاع اچ ہیٹ ویو کیمپس قائم کر ݙتے ڳئن۔ ترجمان پی ڈی ایم اے دے مطابق ہسپتالاں اچ ہیٹ ویو کاؤنٹرز تے ادویات دی فراہمی یقینی بݨائی ویندی پئی اے، تھل چولستان تے جنوبی پنجاب دے اضلاع اچ گرمی تے حبس دی شدت اچ اضافے دا خدشہ اے۔ انھاں آکھیا اے جو صاف پاݨی فلٹریشن پلانٹس تے واٹر باوزرز اتے ٹوبہ جات اچ وی پاݨی دی فراہمی یقینی بݨائی ویندی پئی اے۔ وزیرِاعلیٰ پنجاب دی ہدایات تے زیادہ گرمی تے حبس آلے اضلاع اچ سموگ گنز پڄا ݙتیاں ڳئن، جولائی اچ گرمی تے حبس دی لہر برقرار رہݨ دی پیشنگوئی اے۔ انھاں آکھیا جو عوام کوں بروقت آگاہی فراہم کرݨ کیتے 24 گھنٹے کنٹرول رومز دے ذریعے مانیٹرنگ جاری اے، گرمی تے حبس دی لہر پاروں سارے اضلاع دے کنٹرول رومز کوں ہائی الرٹ تے رکھا ڳئے تانجو کہیں وی ہنگامی صورتحال اچ فوری ردِعمل یقینی بݨایا جا سڳے۔ انھاں آکھیا جو ہسپتال تے ضلعی انتظامیہ ہیٹ سٹروک دے مریضاں کیتے او آر ایس، ٹھنڈا پاݨی تے طبی عملے دی موجودگی یقینی بݨاوے۔ محکمہِ موسمیات، ریسکیو، لائیو اینڈ سٹاک، لوکل ڈیپارٹمنٹ تے ضلعی انتظامیہ مسلسل رابطے اچ ہن تے صورتحال دے مطابق فوری اقدامات کیتے ویندے پئن، شہری علاقیاں اچ امدادی کیمپ، صاف پاݨی، او آر ایس تے ابتدائی طبی امداد دی سہولیات دی فراہمی کیتے موبائل ہیلتھ ٹیماں ہیٹ سٹروک تے پاݨی دی کمی دے کیسز نال نبڑݨ کیتے متحرک تھیسن۔ انھاں آکھیا جو گرمی دی شدت اچ اضافے نال شمالی علاقیاں اچ برف پگھلݨ دی رفتار وی ودھ سڳدی اے، عوام توں اپیل اے جو 10 توں 4 وڄے دے دوران غیر ضروری طور تے گھر توں باہر نہ نکلن اتے ہلکے رنگ دے ڈھلے کپڑے پاوݨ اتے پاݨی دا استعمال زیادہ کرن۔