پیرا اسلام آباد اچ ورچوئل (آن لائن) اسکولاں کیتے ریگولیٹری فریم ورک دی منظوری ݙے ݙتی

اسلام آباد۔10 جولائی (اے پی پی) اسلام آباد کیپیٹل ٹیریٹری پرائیویٹ ایجوکیشنل انسٹی ٹیوشنز ریگولیٹری اتھارٹی (ICT-PEIRA) اسلام آباد کیپیٹل ٹیریٹری (ICT) اچ ورچوئل (آن لائن) اسکولاں کیتے ہک جامع ریگولیٹری فریم ورک دی منظوری ݙے ݙتی اے، جیہڑا پاکستان اچ ڈیجیٹل تعلیم دے فروغ آلے پاسے ہک اہم سنگِ میل اے۔ ایں فریم ورک دے ذریعے پہلی واری آن لائن تے ورچوئل اسکولاں دی رجسٹریشن، ریگولیشن، نگرانی تے معیار کوں یقینی بݨاوݨ کیتے ہک باقاعدہ تے منظم نظام متعارف کرایا ڳئے، جیہڑا ہائیر سیکنڈری سطح تائیں تعلیم فراہم کرݨ آلے اداریاں تے لاگو تھیسی۔ ایں نویں پالیسی دا مقصد معیاری تعلیم تائیں مساوی رسائی کوں فروغ ݙیوݨ اے، بالخصوص ایجھے ٻالاں کیتے جیہڑے اسکول توں باہر ہن (Out-of-School Children)، دور دراز علاقیاں اچ رہندے ہن، خصوصی ضرورتاں دے حامل ہن، ملازمت یا ٻیاں مصروفیات دے باعث روایتی اسکولاں اچ تعلیم حاصل نئی کر سڳدے، یا کہیں وی جغرافیائی، مالی یا جسمانی رکاوٹ دا سامݨا کریندن۔ ایں باقاعدہ ریگولیٹری نظام دے قیام نال شرحِ خواندگی اچ اضافہ تھیسی اتے ایں ڳالھ کوں یقینی بݨایا ویسی جو کوئی وی ٻال تعلیم توں محروم نہ رہوے۔ فریم ورک اچ معیارِ تعلیم کوں یقینی بݨاوݨ کیتے سخت اقدامات شامل کیتے ڳئن، جنھاں اچ اساتذہ کیتے ڈیجیٹل تدریس (Digital Pedagogy) دی لازمی تربیت، محفوظ لرننگ مینجمنٹ سسٹم (LMS) دا استعمال، سائبر سکیورٹی دے تقاضے، مسلسل تعلیمی نگرانی، قومی نصاب نال مطابقت، معیاری امتحانی نظام، طلبہ دی فلاح تے بہبود تے ڈیٹا دے تحفظ دے اقدامات، نیز مؤثر نگرانی تے تعمیل کوں یقینی بݨاوݨ کیتے پیرا کوں ریڈ اونلی (Read-only) رسائی فراہم کرݨا شامل اے۔ ایں پالیسی اچ پرائمری، مڈل، سیکنڈری تے ہائیر سیکنڈری سطح تے ورچوئل تعلیم کیتے علیحدہ علیحدہ ریگولیٹری معیارات وی مقرر کیتے ڳئن، جنھاں اچ اساتذہ دی اہلیت، اسکرین ٹائم دی حدود، امتحانی طریقہِ کار، عملی سرگرمیاں دے انتظامات تے مانیٹرنگ دے مؤثر نظام شامل ہن تانجو آن لائن تعلیم دا معیار روایتی معیاری تعلیمی اداریاں دے مساوی برقرار رکھیا ونڄ سڳے۔ چیئرمین ICT-PEIRA ڈاکٹر غلام علی ملاح آکھیا جو ایں فریم ورک دی منظوری پاکستان دے تعلیمی نظام کوں ذمہ دارانہ انداز اچ ڈیجیٹل خطوط تے استوار کرݨ آلے پاسے ہک اہم پیش رفت اے۔ انھاں آکھیا جو اگرچہ فیڈرل بورڈ آف انٹرمیڈیٹ اینڈ سیکنڈری ایجوکیشن (FBISE) پہلے ای آن لائن اسکولاں دے طلبہ دے امتحانات دا انعقاد کریندا پئے، تاہم ایں شعبے اچ معیار، شفافیت، احتساب تے یکسانیت کوں یقینی بݨاوݨ کیتے ہک جامع ریگولیٹری پالیسی دی اشد لوڑھ ہئی۔ ڈاکٹر غلام علی ملاح مزید آکھیا جو اے ریگولیٹری فریم ورک ٻئے صوبیاں تے علاقیاں کیتے وی ہک مثالی نمونہ ثابت تھیسی، جئیں دی بنیاد تے او وی آن لائن تعلیم دے مؤثر ریگولیٹری نظام تشکیل ݙے سڳسن۔ انھاں ایں ڳالھ تے زور ݙتا جو مناسب حفاظتی اقدامات تے مضبوط نگرانی دے نال ٹیکنالوجی تعلیم تائیں رسائی ودھاوݨ، معیاری تدریس کوں فروغ ݙیوݨ تے ملک اچ شرحِ خواندگی اچ اضافے کیتے ہک مؤثر ذریعہ ثابت تھی سڳدی اے۔ ڈاکٹر غلام علی ملاح وزارتِ وفاقی تعلیم و پیشہ ورانہ تربیت دا خصوصی شکریہ ادا کریندیں ہوئیں آکھیا جو ایں اہم پالیسی دستاویز دی تیاری اچ وزارت دی مسلسل رہنمائی، حوصلہ افزائی تے ہر سطح تے تعاون کلیدی حیثیت رکھیندے۔ انھاں آکھیا جو وزارت دا وژن تے بھرپور تعاون شواہد تے مبنی تعلیمی اصلاحات تے ڈیجیٹل تبدیلی دے فروغ اچ نہایت اہم کردار ادا کریندا پئے۔ انھاں آکھیا جو اے ریگولیٹری فریم ورک ایں عزم دا مظہر اے جو ICT-PEIRA تعلیمی شعبے اچ جدت کوں مؤثر گورننس، اعلیٰ معیار، شفافیت تے طلبہ دے تحفظ دے نال ہم آہنگ کریندیں ہوئیں پاکستان اچ ساریاں کیتے جامع، آسان رسائی تے مستقبل دے تقاضیاں نال ہم آہنگ تعلیمی مواقع فراہم کرݨ کیتے آپݨی کوششاں جاری رکھیسی۔