پاک فوج، فرنٹیئر کور تے بلوچستان پولیس دا “آپریشن شعبان” جاری، مختلف علاقیں اچ دہشت گرداں دے خلاف کارروائیاں

کوئٹہ۔10 جولائی (اے پی پی) سکیورٹی ذرائع موجب بلوچستان دے ضلع منگی ڈیم پولیس سٹیشن تے دہشت گرد حملے دے بعد پاک فوج، فرنٹیئر کور (ایف سی) تے بلوچستان پولیس دے پاسوں مشترکہ کارروائی “آپریشن شعبان” جاری اے جیں دے دوران مختلف علاقیں اچ دہشت گرداں دے خلاف کارروائیاں کیتیاں ویندیاں پئن۔ سکیورٹی ذرائع ݙسائے جو 6 تے 7 جولائی کوں کیتیاں ڳئیاں کارروائیاں اچ فتنہ الخوارج نال تعلق رکھݨ آلے 26 دہشت گرد ہلاک کیتے ڳئن جݙاں جو گزریل 24 گھنٹے دے دوران مزید 13 دہشت گرد مارئے ڳئن جئیں دے بعد آپریشن شعبان دے دوران ہلاک تھیوݨ آلے دہشت گرداں دی مجموعی تعداد 39 تھی ڳئی اے۔ذرائع موجب دشوار گزار پہاڑی علاقیں اچ دہشت گرداں دا گھیرا مزید تنگ کر ݙتا ڳئے تے زمینی و فضائی کارروائیاں دے ذریعے مختلف جہیں تے آپریشن جاری اے۔ سکیورٹی ذرائع دا آکھݨ اے جو اڄ سویلےخضدار دے علاقے زیدی اچ دہشت گرداں دے پاسوں پولیس سٹیشن تے حملے دی کوشش کوں وی ناکام بݨا ݙتا ڳیا۔ فوری کارروائی دے دوران پاک فوج تے ایف سی دے دستیں اٹھ دہشت گرد ہلاک کرݙتے جݙاں جو ہیلی کاپٹر آپریشنز اچ مزید پنج توں چھی دہشت گرداں دے مارئے ونڄݨ دیاں اطلاعات وی ملئن۔ سکیورٹی ذرائع موجب 5 جولائی توں جاری آپریشن شعبان تے ٻیاں انٹیلی جنس بنیاداں تے کیتے ونڄݨ آلے آپریشنز اچ ہݨ تئیں مجموعی طور تے 75 دہشت گرد ہلاک کیتے ڳئن۔ سکیورٹی ذرائع ایں عزم دا اظہار کیتے جو دہشت گردی دے خاتمے تے علاقے اچ امن و استحکام دے قیام تئیں کارروائیاں جاری رہسن۔