وفاقی وزیر پروفیسر احسن اقبال دی ناسا حکام تے امریکی ایرو سپیس کمپنیاں دے نمائندیں نال اہم ملاقات

اسلام آباد۔10 جولائی (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال ہیوسٹن اچ ناسا حکام تے امریکی ایرو سپیس کمپنیاں دے نمائندیں نال اہم ملاقاتاں کیتیاں جنھاں اچ پاکستان دے خلائی وژن، خلائی تعلیم، سائنسی تحقیق تے نوجواناں کیتے عالمی معیار دے موقع پیدا کرݨ متعلق مختلف امور تے تفصیلی ڳالھ مہاڑ کیتی ڳئی۔ اتھاں وزارتِ منصوبہ بندی، ترقی و خصوصی اقدامات توں جاری پریس ریلیز موجب وفاقی وزیر آکھیا جو حکومتِ پاکستان نوجوان نسل اچ سائنسی جستجو، تحقیق تے جدت دا جذبہ بیدار کرݨ کیتے قومی سپیس ایجوکیشن پروگرام تے کم کریندی پئی اے۔ انھاں آکھیا جو نارووال اچ سپیس ایکسپلوریشن سینٹر دے قیام دا منصوبہ ایں وژن دا حصہ اے، جیں دا مقصد نویں نسل کوں کائنات، سائنس تے خلائی تحقیق توں روشناس کراوݨا تے انھاں کوں مستقبل دے سائنسداناں، محققین تے موجداں دے طور تے تیار کرݨا اے۔پروفیسر احسن اقبال آکھیا جو سپیس لرننگ سینٹر محض ہک تعلیمی منصوبہ نی بلکہ قومی سطح تے علم، تحقیق تے اختراع دے ودھارے دا ہک اہم سنگِ میل ہوسی۔ انھاں آکھیا جو خلائی سائنس توں ٻالاں تے نوجواناں کوں روشناس کراوݨا دراصل پاکستان دے مستقبل اچ سرمایہ کاری اے، کیوں جو ایہے نوجوان اڳوں چل تے ملک دی سائنسی، تحقیقی تے ٹیکنالوجیکل ترقی دی قیادت کریسن۔ انھاں آکھیا جو پاکستانی نوجوان دنیا دا قیمتی ٹیلنٹ ہن تے حکومت چاہندی اے جو ناسا تے امریکی اداریں دی سانجھ نال انھاں کوں عالمی معیار دی تربیت، تحقیق تے عملی تجربے دے موقع ݙتے ونڄن۔ انھاں ایں ڳالھ تے زور ݙتا جو پاکستان دے نوجوان انجینئرز، سائنسدان تے آئی ٹی ماہرین عالمی خلائی صنعت اچ نمایاں کردار ادا کرݨ دی مکمل صلاحیت رکھیندن تے جے انھاں کوں درست رہنمائی، تربیت تے عالمی رابطے میسر ہوون تاں او ملک کیتے غیر معمولی کامیابیاں حاصل کر سڳدن۔وفاقی وزیر امریکی ایرو سپیس کمپنیاں کوں پاکستان اچ ڈویلپمنٹ سینٹرز قائم کرݨ تے پاکستانی نوجوان ٹیلنٹ توں استفادہ کرݨ دی دعوت ݙیندیں آکھیا جو پاکستان اچ خلائی سائنس تے ٹیکنالوجی دے ودھارے کیتے ناسا دے تجربے تربیتی پروگرامز تے علمی تعاون توں بھرپور فیدہ چاوݨ چاہندوں۔ انھاں آکھیا جو ناسا تے امریکی صنعت دی پاسوں تعاون اچ گھاٹی دلچسپی پاکستان کیتے حوصلہ افزاء پیش رفت اے تے ایں توں سائنسی و تکنیکی تعاون دے ہک نویں باب دا آغاز تھی سڳدے۔ پروفیسر احسن اقبال آکھیا جو پاکستان دا ہدف 2035ء تئیں چندر تے قومی مشن بھیجݨ تے 2047ء تئیں قمری موجودگی قائم کرݨا اے۔ انھاں آکھیا جو اے وژن محض خلائی مہمات تئیں محدود نی بلکہ علم، تحقیق، جدت تے جدید ٹیکنالوجی تے مبنی معیشت دی بنیاد رکھݨ دی ہک جامع قومی حکمتِ عملی اے۔ انھاں دا آکھݨ ہئی جو پاکستان دے خلائی پروگرام کوں عالمی شراکت داری، جدید تحقیق تے نوجوان افرادی قوت دے ذریعے اڳوں ودھایا ویسی تاں جو ملک کوں سائنس و ٹیکنالوجی دے میدان اچ نویں بلندیاں تئیں پڄایا ونڄ سڳے۔انھاں آکھیا جو ناسا تے امریکی صنعت دے نال تعاون توں پاکستان اچ سائنس، خلائی تعلیم تے تحقیق دے نویں دور دا آغاز تھیسی۔ انھاں موجب پاکستان تے امریکہ دے تعلقات دا نواں رخ تعلیم، موسمیاتی تعاون، سائنسی تحقیق، اختراع تے خلائی ٹیکنالوجی تے استوار ہووݨا چاہیدے۔ انھاں آکھیا جو ویلھا ڳئے جو ݙوہیں ملکاں دے تعلقات کوں جیوپولیٹکس توں اڳوں ودھا تے جیو اکنامکس، سائنس تے ٹیکنالوجی شراکت داری تئیں وسعت ݙتی ونڄے۔ وفاقی وزیر آکھیا جو پاکستان سائنس، اختراع تے عالمی شراکت داری دے ذریعے آپݨے روشن مستقبل دی بنیاد رکھیندا پئے۔ انھاں ایں عزم دا اعادہ کیتا جو حکومت نوجواناں کوں جدید علوم، تحقیق تے ٹیکنالوجی نال جوڑݨ کیتے ہر ممکن اقدامات کریسی تانجو پاکستان خطے اچ سائنسی ترقی، خلائی تحقیق تے اختراعی معیشت دے ہک مضبوط مرکز دے طور تے ابھر سڳے۔