چیئرمین سینیٹ دا نوجواناں کوں بااختیار بݨاوݨ تے زور

اسلام آباد۔11 جولائی (اے پی پی) چیئرمین سینیٹ سید یوسف رضا گیلانی آکھیا جو عالمی یومِ آبادی نوجواناں اچ سرمایہ کاری تے انھاں کوں آپݨی صلاحیتاں دے بھرپور اظہار دے مواقع فراہم کرݨ دی اہمیت اجاگر کریندے، ایں سال دا موضوع ’’اڄ تے مستقبل اچ نوجواناں دیاں امیداں تے امنگاں کوں حقیقت دا روپ ݙیوݨا‘‘ ایں امر دا تقاضا کریندے جو نوجواناں کوں قومی ترقی دے عمل اچ مؤثر کردار ادا کرݨ کیتے بااختیار بݨایا ونڄے۔ ہفتے کوں عالمی یومِ آبادی دے موقعے تے آپݨے سنیھے اچ چیئرمین سینیٹ آکھیا جو پاکستان دی وݙی نوجوان آبادی ہک قیمتی قومی اثاثہ اے، معیاری تعلیم، بہتر صحت دیاں سہولیات، فنی مہارتوں دے فروغ تے روزگار دے مناسب مواقع دے ذریعے نوجواناں کوں معاشی ترقی تے سماجی خوشحالی دا محرک بݨایا ونڄ سڳدے۔ سید یوسف رضا گیلانی آکھیا جو آبادی اچ تیز رفتار اضافہ تعلیم، صحت، روزگار، آبی وسائل تے ٻیاں عوامی خدمات تے دباؤ دا باعث بݨدا پیا اے۔ انھاں مؤثر آبادیاتی منصوبہ بندی، خاندانی بہبود دے بارے اچ آگاہی، ماں تےٻال دی صحت دے بہتر انتظامات تے انسانی وسائل اچ مسلسل سرمایہ کاری دی ضرورت تے زور ݙتا۔