اسلامی دنیا عملی تے پائیدار اقدامات دے ذریعے تریمتاں کوں ترقی دے قومی دھارے اچ مؤثر کردار ادا کرݨ دے موقع ݙیوے، چیئرمین سینیٹ دا او آئی سی وزارتی کانفرنس توں خطاب

اسلام آباد۔ 13 جولائی (اے پی پی) چیئرمین سینیٹ سید یوسف رضا گیلانی اسلامی دنیا تے زور ݙتے جو او تریمتاں کوں معاشی طور تے بااختیار بݨاوݨ کیتے صرف اعلانات تئیں محدود نہ رہے بلکہ عملی تے پائیدار اقدامات دے ذریعے تریمتاں کوں ترقی دے قومی دھارے اچ مؤثر کردار ادا کرݨ دے موقع ݙیوے، تریمتاں کوں بااختیار بݨاوݨ نہ صرف پائیدار ترقی کیتے ناگزیراے بلکہ اے اسلام دی بنیادی تعلیمات تے اجتماعی ذمہ واری دا تقاضا وی اے۔ انھاں اے ڳالھ 9 ویں او آئی سی وزارتی کانفرنس برائے تریمتاں توں بطورِ مہمانِ خصوصی خطاب کریندیں آکھی ۔ چیئرمین سینیٹ او آئی سی دے رکن ملکاں دے وزراء، مندوبین، پارلیمنٹیرینز تے معزز مہماناں کوں پاکستان آوݨ تے خوش آمدید کریندے آکھیے جو اسلام چوݙاں صدیاں پہلے تریمتاں کوں تعلیم، وراثت، جائیداد، معاشی سرگرمیاں تے سماجی وقار دے حقوق عطا کرتے انھاں کوں عزت، مساوات تے انصاف دا او مقام ݙتا جیں دی دنیا اچ مثال نئی ملدی۔ انھاں آکھیا جو قرآن مجید تے اسوہ رسول اکرم ﷺ تریمتاں دے احترام، قیادت، علم تے سماجی کردار دے روشن نمونے پیش کریندن۔انھاں آکھیا جو ’’پائیدار ترقی کیتے تریمتاں دا معاشی استحکام‘‘ صرف ہک کانفرنس دا موضوع نئی بلکہ مسلم دنیا دے روشن مستقبل دی بنیاد اے۔ انھاں مسلم تریمتاں دی تعلیم، تجارت، سائنس، سفارت کاری، سیاست، سماجی خدمت تے قیادت دے مختلف شعبیں اچ نمایاں خدمات کوں خراجِ تحسین پیش کریندیں آکھیا جو مسلم تریمتاں ہر دور اچ تہذیباں دی تعمیر تے معاشریں دی ترقی اچ کلیدی کردار ادا کیتے۔ سید یوسف رضا گیلانی شہید محترمہ بینظیر بھٹو کوں زبردست خراجِ عقیدت پیش کریندیں آکھیا جو او نہ صرف پاکستان بلکہ پوری مسلم دنیا دی پہلی تریمت وزیرِاعظم ہن، جنھاں تریمتاں دے حقوق، جمہوریت تے مساوی موقع دے ودھارے کیتے تاریخی جدوجہد کیتی۔ انھاں آکھیا جو اڄ مسلم دنیا دی تریمتاں شہید محترمہ بینظیر بھٹو دے وژن تے مشن کوں اڳوں ودھیندیں قومی، علاقائی تے عالمی سطح تے نمایاں کامیابیاں حاصل کریندیاں پئن۔چیئرمین سینیٹ آکھیا جو او آئی سی دے رکن ملکاں دی تقریباً ادھی آبادی تریمتاں تے مشتمل اے، ایں کیتے تریمتاں کوں معاشی، سماجی تے سیاسی موقع توں محروم رکھ تے پائیدار ترقی دا خواب ہرگز شرمندہِ تعبیر نئی کیتا ونڄ سڳدا۔ انھاں ایں عزم دا اعادہ کیتا جو پاکستان تریمتاں کوں تعلیم، ڈیجیٹل شمولیت، کاروباری موقع، مالیاتی سہولتاں تے باعزت روزگار ݙیوݨ کیتے آپݨیاں کوششاں مزید تکھیاں کریسی۔ انھاں آکھیا جو بینظیر انکم سپورٹ پروگرام تے وسیلہِ تعلیم جیھے منصوبیں لکھاں تریمتاں کوں معاشی تحفظ ݙیوݨ دے نال نال ٻالڑیاں دی تعلیم دے ودھارے اچ وی اہم کردار ادا کیتے۔ ایویں سٹیٹ بینک آف پاکستان دی مالیاتی سہولتاں، تریمتاں دی زیرِ قیادت کاروباری اداریں دی سرپرستی، ڈیجیٹل مہارتاں دے ودھارے تے ای کامرس دے موقع ہزاراں تریمتاں کوں خود مختار کاروباری شخصیت دے طور تے ابھرݨ اچ مدد ݙتی اے۔آپݨے دورِ وزارتِ عظمیٰ دا ذکر کریندیں سید یوسف رضا گیلانی آکھیا جو انھاں دی حکومت تریمتاں دے حقوق دے تحفظ کیتے تاریخی قانون سازی کیتی، جیں اچ تحفظِ خواتین از ہراسگی ایکٹ 2010، ایسڈ کنٹرول اینڈ ایسڈ کرائم پریوینشن ایکٹ 2010، انسدادِ خواتین مخالف رسومات ایکٹ 2011 تے ویمن اِن ڈسٹریس اینڈ ڈیٹینشن فنڈ (ترمیمی) ایکٹ 2011 شامل ہن۔ انھاں آکھیا جو انھاں اصلاحات پاکستان اچ تریمتاں دے تحفظ، وقار تے مساوی حقوق دے ودھارے اچ بنیادی کردار ادا کیتا۔ انھاں آکھیا جو بینظیر انکم سپورٹ پروگرام دا آغاز انھاں دی حکومت دا ہک انقلابی اقدام ہئی جیں دے ذریعے لکھاں تریمتاں کوں براہِ راست مالی وسائل کیتے انھاں کوں معاشی فیصلیں اچ بااختیار بݨایا ڳیا۔ انھاں اے وی یاد ݙوایا جو انھاں دی حکومت 22 دسمبر کوں ورکنگ ویمن ڈے قرار ݙتا تے ویمن پارلیمنٹری کاکس قائم کیتی تاں جو پارلیمانی سطح تے تریمتاں دے مسئلیں کوں مستقل بنیاداں تے ترجیح ݙتی ونڄ سڳے۔چیئرمین سینیٹ آکھیا جو تریمتاں دی حقیقی ترقی تعلیم تے صحت نال جڑی ہوئی اے۔ انھاں آکھیا جو پاکستان ٻالڑیاں دی تعلیم دے ودھارے، وظائف، خصوصی تعلیمی پروگراماں، زچہ و بچہ دی صحت تے بنیادی طبی سہولتاں ݙٰوݨ کیتے آپݨی سرمایہ کاری اچ مسلسل ودھارا کریندا پئے تاں جو تریمتاں تے سماجی زندگی اچ بھرپور کردار ادا کرسڳن۔ انھاں جھیڑیں، قبضے، غربت، موسمیاتی تبدیلی، بے دخلی تے انسانی بحراناں توں متاثرہ تریمتاں دی اوکھ تے تشویش کریندیں او آئی سی ملکاں تے زور ݙتا جو او مشترکہ حکمتِ عملی، وسائل دے مؤثر استعمال، تجربیں دے تبادلے تے سانجھے تعاون دے ذریعے تریمتاں کوں پیش آندے چیلنجز نال نبڑݨ کیتے مربوط اقدامات کرن۔