وفاقی وزیر قومی صحت نال چیف ایگزیکٹو افسر دی انڈس ہاسپٹل اینڈ ہیلتھ نیٹ ورک دی وفد دے رلے ملاقات

اسلام آباد۔ 13 جولائی (اے پی پی) وفاقی وزیر قومی صحت مصطفیٰ کمال نال چیف ایگزیکٹو افسر دی انڈس ہاسپٹل اینڈ ہیلتھ نیٹ ورک ڈاکٹر عبدالباری خان وفد دے رلے ملاقات کیتی۔ ایں دوران پاکستان اچ ریبیز روکݨ تے مؤثر کنٹرول کیتے قومی سطح تے وقتی اقدامات تے تفصیلی ڳالھ مہاڑ کیتی۔ وفد وفاقی وزیر کوں پاکستان اچ ریبیز دی موجودہ صورتحال تے بریفنگ ݙیندیں ݙسائے جو ملک اچ ریبیز دی نگرانی دا کوئی مؤثر قومی نظام موجود کائنی تاں جو دستیاب اندازیں موجب ہر سال تقریباً 5 ہزارلوک ریبیز پاروں جان دی بازی ہر ویندن جݙاں جو لکھاں لوک ہر سال کُتے دے کٹݨ دا شکار تھیندن۔ اِنھاں متاثرین اچ ٻالاں دیہاتی علاقیں رہݨ آلے تے شہری مضافات دی محروم آبادی دا تناسب زیادہ اے۔وفاقی وزیر صحت مصطفیٰ کمال پاکستان اچ ریبیز دے ودھدے ٻوجھ تے تشویش کریندیں قومی ریبیز پریوینشن اینڈ کنٹرول فریم ورک دی تیاری دی اصولی منظوری ݙتی۔ انھاں ہدایت کیتی جو ایں مقصد کیتے وقتی نیشنل ٹیکنیکل ورکنگ ایڈوائزری گروپ تشکیل ݙتا ونڄے جیڑھا قومی فریم ورک دی تیاری دی قیادت کریسی۔ وزیر صحت آکھیا جو ریبیز ہک قابلِ تدارک بیماری اے تے عوام کوں ایں توں محفوظ رکھݨ کیتے ملک گیرآگاہی مہم دا آغاز کیتا ویسی۔ انھاں بالخصوص وزیرِاعلىٰ سندھ دی قیادت اچ جاری صوبہ بھر دی انسدادِ ریبیز مہم دی تعریف کیتی تے دی انڈس ہاسپٹل اینڈ ہیلتھ نیٹ ورک دی تکنیکی معاونت کوں قابلِ قدر قرار ݙتا۔ مصطفیٰ کمال ایں عزم دا اظہار کیتا جو وفاقی حکومت، صوبائی حکومتاں تے تکنیکی شراکت دار سانجھے تعاون نال پاکستان اچ ریبیز توں تھیوݨ آلیاں قابلِ تدارک اموات مکاوݨ کیتے مؤثر اقدامات کریسن۔ایں موقعے تے ڈاکٹر عبدالباری خان وفاقی وزیر کوں “Sindh Official Guidelines for Prevention of Human Rabies (2024)” پیش کیتیاں جیڑھیاں دی انڈس ہاسپٹل اینڈ ہیلتھ نیٹ ورک دی تکنیکی معاونت نال تیار کیتیاں ڳئن۔ وفاقی وزیر صحت مرحومہ پروفیسر نسیم صلاح الدین کوں خراجِ عقیدت پیش کریندیں انھاں دی وفات تے ݙکھ تے افسوس کیتا تے اہلِ خانہ نال تعزیت کیتی۔ انھاں آکھیا جو پروفیسر نسیم صلاح الدین دی ریبیز روکݨ تے پاکستان اچ عوامی صحت دے ودھارے کیتے خدمات ہمیشہ یاد رکھیاں ویسن۔