پاکستان تے فلپائن دا سانجھی تجارت 500 ملین ڈالر تئیں ودھاوݨ دا عزم، نجی شعبہ تے چیمبرز تجارت تے اقتصادی تعلقات دے ودھارے اچ کلیدی کردار ادا کرسڳدن، فلپائن دے سفیر ڈاکٹر ایمانوئل آر فرننڈیز دا اے پی پی کوں انٹرویو

اسلام آباد۔ 10 اگست (اے پی پی) پاکستان اچ فلپائن دے سفیر ڈاکٹر ایمانوئل آر فرننڈیز پاکستان تے فلپائن وچال سانجھی تجارت کوں 500 ملین امریکی ڈالر تئیں ودھاوݨ دے عزم دا اعادہ کریندیں آکھیے جو ݙوہیں ملکاں دے نجی شعبے تے چیمبرز آف کامرس تجارت تے اقتصادی تعلقات دے ودھارے اچ اہم کردار ادا کر سڳدن۔اے ڳالھ انھاں قومی خبر رساں ادارے ایسوسی ایٹڈ پریس آف پاکستان (اے پی پی) کوں خصوصی انٹرویو اچ آکھی۔ ڈاکٹر ایمانوئل آر فرننڈیز آکھیا جو پاکستان تے فلپائن وچال موجودہ سانجھی تجارت 197 ملین امریکی ڈالر اے جیڑھی ݙوہیں ملکاں دی حقیقی تجارتی صلاحیت توں نمایاں طور تے گھٹ اے، ایں کیتے تجارت، سرمایہ کاری تے کاروبار توں کاروبار (بی ٹو بی) دے رابطیں کیتے نویں موقع تلاش کرݨ دی لوڑھ اے۔فلپائنی سفیر آکھیا جو فلپائن آبادی دے لحاظ نال ایسوسی ایشن آف ساؤتھ ایسٹ ایشین نیشنز (آسیان) دی ݙوجھی وݙی مارکیٹ اے تے پاکستان کیتے آسیان خطے دا ہک اہم گیٹ وے ثابت تھی سڳدے۔ فلپائن آسیان دے رکن ملکاں دے نال پاکستان دے تجارتی تے اقتصادی رابطے تکڑا بݨاوݨ اچ وی اہم کردار ادا کرسڳدے۔انھاں آکھیا جو آسیان دے نال علاقائی آزاد تجارتی معاہدے کوں حتمی شکل ݙیوݨ دے بعد پاکستان 4 ٹریلین امریکی ڈالر دی آسیان مارکیٹ توں نمایاں فیدہ چا سڳدے، ایجھی اقتصادی شمولیت پاکستان دے علاقائی اقتصادی انضمام، برآمدات تے جنوب مشرقی ایشیائی معیشتاں دے نال رابطیں دے ودھارے اچ ہک اہم سنگِ میل ثابت تھیسی۔انھاں آکھیا جو پاکستان فلپائن مشترکہ اقتصادی کونسل پہلے ہی ݙوہیں ملکاں وچال اقتصادی تے تجارتی تعلقات، سرمایہ کاری متعلق امور تے سانجھی تجارت اچ ودھارے دی پیش رفت دا جائزہ گھنݨ کیتے ہک اہم ادارہ جاتی طریقہ کار دے طور تے کم کریندی پئی اے۔سفیر آکھیا جو اسلام آباد اچ فلپائن دا سفارتخانہ پاکستانی مسافراں کوں مزید ویزے جاری کرݨ تے ویزا عمل کوں سوکھا بݨاوݨ کیتے اقدامات کریندا پئے، ہر سال 5000 توں ودھ پاکستانی سیاحت کیتے فلپائن دا دورہ کریندن جݙاں جو فلپائن دے شہریاں دی ہک قابلِ ذکر تعداد وی پاکستان بالخصوص شمالی علاقیں دیاں سوہݨیاں جہیں دی سیر کیتے دورہ کریندی اے۔انھاں ݙسایا جو اسلام آباد اچ فلپائن دا سفارتخانہ ایں ویلھے ماہانہ تقریباً 320 ویزے جاری کریندا پئے۔ انھاں آکھیا جو پاکستان تے فلپائن وچال براہِ راست فضائی رابطے دے قیام دے امکان کوں مسترد نی کیتا ونڄ سڳدا کیوں جو براہِ راست پروازاں سیاحت، کاروبار تے عوامی رابطیں دے ودھارے کیتے اہم ہوسن۔سفیر آکھیا جو فلپائن اچ 7600 توں ودھ جزیرے ہن تے اُتھا سیاحت دے وسیع موقع موجود ہن۔ متنوع ثقافت، معاشرہ تے قدرتی مقام ایں کوں پاکستانی سیاحواں کیتے ہک پرکشش منزل بݨیندن جݙاں جو پاکستان دے شمالی علاقیں اچ وی فلپائنی سیاحواں کوں راغب کرݨ دی قابلِ ذکر صلاحیت موجود اے۔انھاں آکھیا جو پاکستان تے فلپائن وچال حلال مصنوعات دے شعبے اچ تجارت تے تعاون دے وسیع امکانات موجود ہن تے ݙوہیں ملک ایں شعبے اچ پہلے ہی نمایاں پیش رفت کرچکئن۔انھاں آکھیا جو سیاحت، حلال طبی مصنوعات تے حلال بیوٹی مصنوعات انھاں ابھردے ہوئے شعبیں اچ شامل ہن جتھاں ݙوہیں ملک تعاون کوں مزید وسعت ݙے سڳدن۔ انھاں مزید آکھیا جو اے شعبہ مستقبل اچ ݙوہیں ملکاں وچال اقتصادی رابطیں کیتے نمایاں موقع ݙیندے۔سفیر آکھیا جو پاکستان تے فلپائن وچال بلیو تے گرین اکانومی دے شعبیں اچ وی تعاون دے وسیع موقع موجود ہن تے ݙوہیں ملک انھاں ابھردے شعبیں اچ تعاون دے امکانات ڳولݨ اچ پہلے ہی نمایاں پیش رفت کر چکئن۔انھاں ادویہ سازی، آٹوموبائلز، الیکٹرانکس، ای کامرس، سیاحت تے زراعت دی سانجھی تجارت تے سرمایہ کاری دے ودھارے کیتے اہم شعبیں دے طور تے نشاندہی کیتی تے آکھیا جو ݙوہیں ملکاں دے نجی شعبیں وچال زیادہ رابطے نویں کاروباری موقع دی نشاندہی تے موجودہ صلاحیت کوں ٹھوس اقتصادی شراکت داری اچ تبدیل کرݨ اچ مدد ݙے سڳدن۔سفیر پاکستان تے فلپائن وچال نینگراں دے سانجھے رابطیں کوں تکڑا بݨاوݨ دی اہمیت تے وی زور ݙیندیں آکھیا جو ݙوہیں ملکاں دے نوجوان ای کامرس، ڈیجیٹل انٹرپرینیورشپ تے ڈیجیٹل اکانومی دے ودھارے اچ اہم کردار ادا کر سڳدن۔فلپائن دے سفیرمزید آکھیا جو پاکستان تے فلپائن دیاں یونیورسٹیاں طالبِ علماں کوں سکالرشپس ݙیوݨ کیتے معاہدیں دے پاسے ودھدیاں پئن جیں توں تعلیمی تعاون تکڑا تھیسی تے ݙوہیں ملکاں دے نوجواناں کیتے ہک ٻئے دے تعلیمی تے پیشہ ورانہ تجربیں توں استفادہ کرݨ دے مزید موقع پیدا تھیسن۔