آبنائے ہرمز اچ تیل دے اخراج توں ماحولیاتی نقصان دا تخمینہ کھرباں ڈالر تھی سڳدے، ایران

تہران (اے پی پی) ایران اکھیا جو آبنائے ہرمز اچ تیل دے اخراج توں ماحولیاتی نقصان دا تخمینہ کھرباں ڈالر تھی سڳدے۔ تاس دے مطابق ایرانی وزارتِ خارجہ دے ترجمان اسماعیل بقائی ایکس تے آپݨی پوسٹ اچ جزیرہ قشم دے قریب تیل دے رساؤ دی فوٹیج شامل کیتی اتے ایں واقعے دا ذمہ دار ہک غیر ملکی جہاز کوں قرار ݙتا۔ انہاں لکھیا جو اے واقعہ خطے دے ممالک دے ساحلی علاقیاں اچ آلودگی دی صرف ہک مثال اے۔ انہاں اکھیا جو آلودگی گزریل کچھ ݙہاکیاں دے دوران خلیج فارس تے بحیرہ عمان دے پاݨیاں دے نال نال خطے دے سمندری ماحولیاتی نظام کوں بگاڑ ݙتے تے ایرانی ساحلی علاقیاں دے سمندری ماحولیاتی نظام کوں کھرباں ڈالر دا نقصان تھیے۔ انہاں اکھیا جو تجارتی بحری آپریشنز اچ ملوث تمام فریقین کوں خطے اچ ایں آلودگی کوں صاف کرݨ دی قانونی تے اخلاقی ذمہ داری قبول کرݨی ہوسی۔ واضح رہے جو 247 میٹر طویل تیل بردار بحری جہاز “کیرولین بیزنگی” جیڑھا مئی اچ بحیرہ اسود دی ہک بندرگاہ توں روانہ تھیا ہئی، دے عملے 8 جون کوں جہاز تے دھماکے دی اطلاع ݙتی ہئی۔ ایں دے بعد اے بحری جہاز عمان دے صوبہ ظفار اچ الحلانیات جزائر دے نیڑے پھس ڳیا جئیں دے نتیجے اچ ایں توں تیل دا رساؤ شروع تھی ڳیا جئیں ہݨ تئیں عمان دی 12 کلومیٹر ساحلی پٹی کوں آلودہ کر ݙتے۔