امریکہ تے ایران وقتی مذاکرات ول شروع کرن، سیکرٹری جنرل اقوامِ متحدہ

اقوامِ متحدہ۔18اگست (اے پی پی) اقوامِ متحدہ دے سیکرٹری جنرل انتونیو گوتریش امریکہ تے ایران تے زور ݙتے جو وسیع معاہدے تئیں پُڄݨ کیتے مقررہ 60 ݙینھ دی مدت ختم تھیوݨ دے بعد مذاکرات ول شروع کیتے ونڄن تے خبردار کیتا جو جھیڑے دا کوئی فوجی حل کائنی ۔ اقوامِ متحدہ دے ترجمان سٹیفن دوجارک صحافیاں کوں ݙسائے جو اقوامِ متحدہ دے سربراہ دا موقف 28 فروری کوں امریکہ تے اسرائیل دی طرفوں ایران تے حملے شروع کیتے ونڄݨ دے بعد توں تبدیل نی تھیا۔ ترجمان آکھیا جو اقوامِ متحدہ دے سیکرٹری جنرل دا پیغام اوہو اے جیڑھا او آغاز توں ݙیندے آندن جو ایں جھیڑے دا کوئی فوجی حل کائنی۔ انہاں آکھیا جو اقوامِ متحدہ دے سربراہ امریکہ تے ایران تے زور ݙیندن جو اووقتی ہک پرامن تے پائیدار حل کیتے مذاکرات ول شروع کرن، فوجی کارروائی توں گریز کرن تے اڄوکے ݙینھاں اچ سݨݨ وچ آوݨ آلی کشیدگی تے مبنی بیان بازی وچ وی گھٹکی گھن آون۔ سٹیفن دوجارک دا اے بیان ایجھے ویلھے سامݨے آئے جݙاں 60 ݙینہاں دی مذاکراتی مدت کہیں جامع معاہدے دے بغیر ختم تھی ڳئی۔ پاکستان دی ثالثی نال تھیوݨ آلے سفارتی مذاکرات دے بعد امریکہ تے ایران دے صدور ڈونلڈ ٹرمپ تے مسعود پزشکیان 14 نکاتی مفاہمتی یادداشت، جیں کوں ’’اسلام آباد میمورنڈم‘‘ آکھیا ویندے، تے آن لائن دستخط کیتن۔ ایں دے نال ݙوہیں ملکاں جنگ بندی وچ 60 ݙینہاں دی توسیع تے وی اتفاق کیتا ہئی۔ ایں توں پہلے ایرانی وزارتِ خارجہ دے ترجمان اسماعیل بقائی آکھیا ہئی جو 17 جون دی مفاہمتی یادداشت دے بعد امریکہ دے نال مذاکرات کیتے مقررہ 60 ݙینہاں دی مدت، انہاں دے بقول امریکہ دی طرفوں کیتیاں ونڄݨ آلیاں کھلی خلاف ورزیاں دے بعد آپݨی اہمیت ونڄا چکی اے۔ سٹیفن دوجارک توں اسرائیل وچ امریکی صدر ڈونلڈ ٹرمپ دے مشیر تے جاݨو جیرڈ کشنر تے اسرائیلی وزیرِاعظم بینجمن نیتن یاہو وچال تھیوݨ آلی اڄوکی ملاقات بارے وی سوال کیتا ڳیا۔ انہاں آکھیا جو میں کنے اڄوکی ملاقاتاں بارے وچ کوئی تازہ معلومات کائنی۔