سپیکر قومی اسمبلی نال ملائیشین وزیرِ داخلہ دی سربراہی اچ وفد دی ملاقات، آپسی دلچسپی دے معاملیاں تے ڳالھ مہاڑ

اسلام آباد۔21اگست (اے پی پی) سپیکر قومی اسمبلی سردار ایاز صادق نال جمعے کوں ملائیشیا دے وزیرِ داخلہ سیف الدین ناسوٹین بن اسماعیل دی سربراہی اچ چھی رکنی پارلیمانی وفد ملاقات کیتی جئیں دوران ݙوہیں ملکاں دے دیرینہ برادرانہ تعلقات، ݙوپاسہ تعاون تے آپسی دلچسپی دے معاملیاں تے ڳالھ مہاڑ کیتی ڳئی۔ قومی اسمبلی سیکرٹریٹ دے مطابق سپیکر ملائیشین وزیرِ داخلہ تے پارلیمانی وفد دا پارلیمنٹ ہاؤس آوݨ تے خیرمقدم کیتا۔ ایں موقع تے وزیرِ مملکت برائے داخلہ طلال چوہدری وی موجود ہن۔ سردار ایاز صادق پاکستان تے ملائیشیا وچال پارلیمانی تعاون دے فروغ دی ضرورت تے زور ݙیندیں ہوئیں اکھیا جو پارلیمانی فرینڈشپ گروپس آپسی رابطیاں کوں فروغ ݙیوݨ اچ اہم کردار ادا کر سڳدن،انہاں آکھیا جو پاکستان افغانستان کوں متعدد بار آگاہ کیتا جو افغان سرزمین توں اساݙے معصوم شہریاں کوں نشانہ بݨایا ویندا پئے، افغانستان دی سرزمین پاکستان دے خلاف دہشتگردی کیتے استعمال تھیووݨ تشویش دا باعث اے۔ملائیشین وزیرِ داخلہ میزبانی تے پرتپاک استقبال تے وفد ولوں اظہارِ تشکر کریندیں ہوئیں آکھیا جو پاکستان سوھݨا ملک اے اتے اسلام آباد دنیا دے سوھݨے ترین شہراں اچوں ہک اے۔ انہاں اکھیا جو موسمیاتی تبدیلی عالمی مسئلہ اے جئیں دے اثرات نال نبڑݨ کیتے تمام ملکاں کوں مشترکہ کوششاں کرݨی ہوسن۔ انہاں دا آکھݨ ہا جو دنیا کوں تنازعات دے بجائے سفارتی کوششاں تے مذاکرات دے ذریعے امن دے قیام تے توجہ ݙیوݨی چاہیدی اے، عالمی امن تے استحکام کیتے سفارتی کوششاں کوں ٻیا موثر بݨاوݨ دی لوڑھ اے۔