سپیکر قومی اسمبلی پارلیمنٹ ہاؤس دے سبزہ زار وچ زیتون دا ٻوٹا رہا تے ساوݨ شجرکاری مہم دا افتتاح کرݙتا

اسلام آباد۔25اگست (اے پی پی) سپیکر قومی اسمبلی سردار ایاز صادق پارلیمنٹ ہاؤس دے سبزہ زار وچ زیتون دا ٻوٹا رہا تے شجرکاری مہم دا افتتاح کیتا۔ ایں تقریب وچ اراکینِ پارلیمنٹ، قومی اسمبلی دے اعلیٰ افسران تے میڈیا دے نمائندیں کثیر تعداد وچ شرکت کیتی۔ ایں موقع تے ملک دی ترقی، خوشحالی تے سلامتی کیتے خصوصی دعا کیتی ڳئی۔سپیکر قومی اسمبلی ایں موقع تے آکھیا جو شجرکاری ماحول دے تحفظ تے آوݨ آلیاں نسلاں دے محفوظ مستقبل دی ضمانت اے، پاکستان کوں سرسبز و شاداب بݨاوݨ کیتے شجرکاری کوں ودھارا ݙیوݨا ہوسی، وݨ موسمیاتی تبدیلی دے منفی اثرات نال نبڑݨ وچ اہم کردار ادا کریندن، اراکینِ پارلیمنٹ تے عوام شجرکاری مہم وچ ودھ چڑھ تے حصہ گھنن۔ انہاں آکھیا جو زیتون دا تیل بہترین خوردنی تیل اے، پاکستان دی آب و ہوا زیتون دی کاشت کیتے موزوں اے، زیتون دی کاشت کوں ودھارا ݙے تے خوردنی تیل دے شعبے وچ پاکستان خود کفیل تھی سڳدے۔ انہاں آکھیا جو شجرکاری ماحولیاتی بہتری دے نال نال معیشت دے ودھارے دا ذریعہ اے، حکومت تے عوام رل تے ملک کوں ساوا بݨاوݨ کیتے آپݨا کردار ادا کرن، صاف، صحت مند تے خوشحال پاکستان کیتے ودھ توں ودھ ٻوٹے رہاوݨ ویلھے دی اہم لوڑھ اے۔ سپیکر سردار ایاز صادق رکنِ قومی اسمبلی فیصل امین دا زیتون دا ٻوٹا ݙیوݨ تے شکریہ ادا کیتا