وزیرِ اعظم شہباز شریف دا ترجیحی شعبیاں اچ سرمایہ کاری کیتے سعودی عرب دی دلچسپی دا خیرمقدم

اسلام آباد۔25 اگست(اے پی پی)وزیرِ اعظم محمد شہباز شریف ترجیحی شعبیاں اچ سرمایہ کاری کیتے سعودی عرب دی دلچسپی دا خیرمقدم کریندے آکھیے جو ݙوہاں ملکاں وچال جی ٹو جی اتے بی ٹو بی مشترکہ تعاون کیتے اے بہترین ویلھا اہے، پاکستان سعودی عرب نال آپݨے اقتصادی تعلقات کوں باہمی مفاد تے مبنی سٹریٹجک اقتصادی شراکت داری اچ وٹاوݨ چاہندے۔ وزیرِ اعظم محمد شہباز شریف نال سعودی پاک مشترکہ بزنس کونسل دے چیئرمین شہزادہ منصور بن محمد آل سعود دی قیادت اچ اعلیٰ سطح دے سعودی کاروباری وفد ملاقات کیتی اے۔ ملاقات اچ وزیرِ اعظم محمد شہباز شریف خادم الحرمین الشریفین شاہ سلمان بن عبدالعزیز آل سعود اتے ولی عہد و وزیرِ اعظم شہزادہ محمد بن سلمان بن عبدالعزیز آل سعود کیتے ݙاݙھا احترام اتے نیک خواہشات پچائن۔ وزیرِ اعظم پاکستان اتے سعودی عرب دے دیرینہ اتے برادرانہ تعلقات دا ݙسیندے ݙوہیں ٻھرا ملکاں وچال اقتصادی تعاون اتے سرمایہ کاری ودھاوݨ دے مختلف امکانات تے الایا۔ انہاں سعودی وفد دا خیرمقدم کیتا۔ وزیرِ اعظم شہزادہ منصور بن محمد آل سعود دے پاکستان دے سابقہ دوریاں دا وی ݙسایا اتے امید کیتی جو انہاں دا اے دورہ پچھونہی ڳالھ مہاڑ کوں اڳو تے ٹورݨ اتے مختلف شعبیاں اچ مفاہمتی یادداشتاں اتے معاہدیاں تے دستخط دی راہ ہموار کریسی۔ شہزادہ منصور بن محمد آل سعود زراعت، بندرگاہواں، شاہراہواں، ہوائی اڈیاں دی آؤٹ سورسنگ، رئیل اسٹیٹ، توانائی، بجلی دی تقسیم اتے انفارمیشن ٹیکنالوجی دے شعبیاں اچ سرمایہ کاری دے مواقع اچ دلچسپی ݙکھائی۔ وزیرِ اعظم انہاں ترجیحی شعبیاں اچ سعودی سرمایہ کاری دی دلچسپی دا خیرمقدم کریندے آکھیا جو ݙوہاں ملکاں دے مشترکہ تعاون کیتے اے ہک بہترین موقع اے۔ سعودی وفد آپݨے دورہ اچ کئی اعلیٰ حکومتی نمائندیاں اتے نجی شعبے دے اہم سٹیک ہولڈرز نال وی ملسن۔

ملاقات اچ وفاقی وزراء رانا تنویر حسین، ڈاکٹر مصدق ملک، جام کمال خان، محمد اورنگزیب، عطاء اللہ تارڑ، جنید انوار چوہدری، علی پرویز ملک، سردار اویس احمد خان لغاری، محمد حنیف عباسی، وزیرِ اعظم دے مشیران محمد علی، ہارون اختر خان، وزیرِ مملکت بلال اظہر کیانی، معاونِ خصوصی طارق فاطمی اتے ٻئے اعلیٰ حکام وی موجود ہن۔