سوئی سدرن کیتے جامع حکمتِ عملی تے پائیدار کاروباری ماڈل تیار کیتا ونڄے، وفاقی وزیرِ پٹرولیم علی پرویز ملک

اسلام آباد۔27اگست (اے پی پی) وفاقی وزیرِ پٹرولیم علی پرویز ملک سوئی سدرن گیس کمپنی لمیٹڈ (ایس ایس جی سی ایل) دے بورڈ کوں ہدایت کیتی اے جو کمپنی کوں مالی طور تے مستحکم تے قابلِ عمل ادارہ بݨاوݨ کیتے ہک جامع حکمتِ عملی تے پائیدار کاروباری ماڈل تیار کیتا ونڄے جیندے وچ بالخصوص یو ایف جی تے قابو پاوݨ تے توجہ ݙتی ونڄے، جݙاں جو عوامی خدمت کوں اولین ترجیح حاصل ہووے۔ ترجمان پٹرولیم ڈویژن موجب وفاقی وزیر کراچی وچ ایس ایس جی سی ایل دے چیئرمین تے بورڈ آف ڈائریکٹرز، منیجنگ ڈائریکٹر تے سینئر انتظامیہ دے نال اجلاس دی صدارت کیتی، جیندے وچ کمپنی دی کارکردگی، اہم کامیابیاں، آپریشنل چیلنجز تے مستقبل دیاں اصلاحاتی ترجیحات دا جائزہ ڳھدا ڳیا۔ ایس ایس جی سی ایل بورڈ دے چیئرمین وفاقی وزیردا خیرمقدم کیتا، جݙاں جو منیجنگ ڈائریکٹر وزیر کوں کمپنی دے اہم سنگِ میل، کامیابیاں تے درپیش چیلنجز دا ݙسایا۔ انتظامیہ ݙسایا جو کمپنی دے گیس ڈسٹری بیوشن نظام وچ نمایاں بہتری آئی اے تے حجم دے اعتبار نال یو ایف جی وچ تقریباً 57 فیصد کمی تھئی اے۔ اجلاس کوں ݙسایا ڳیا جو کے الیکٹرک، صنعتی صارفین تے فرٹیلائزر پلانٹس کیتے گیس دی لوڈشیڈنگ نی کیتی ویندی پئی، جݙاں جو گھریلو صارفین کوں روزانہ ترائے واری گیس ݙتی ویندی پئی اے۔ وفاقی وزیرعلی پرویز ملک آکھیا جو گزریل ہک سال دے دوران گیس دیاں قیمتاں وچ ودھارا نی کیتا ڳیا، جݙاں جو گیس دے گردشی قرضے وچ ودھارا تقریباً روک ݙتا ڳئے، جیڑھا گیس دے شعبے دے استحکام دی پاسے اہم پیش رفت اے۔ وزیر آکھیا جو قیمتاں دے مختلف سلیبز دے ذریعے گیس سبسڈی دے موجودہ نظام تے نظرثانی دی ضرورت اے۔ انہاں سارے صارفین کیتے گیس دی ہک منصفانہ قیمت دی پاسے منتقلی دی لوڑھ تے زور ݙیندے آکھیا جو کمزور طبقیں کوں ہدفی سماجی تحفظ دے پروگراماں دے ذریعے تحفظ ݙتا ونڄے۔ انہاں آکھیا جو ایں منتقلی نال معاشی سرگرمیاں وچ ودھارا تھیسی تے صارفین دی متبادل ایندھن دی پاسے منتقلی وچ کمی آسی۔ انہاں ایس ایس جی سی ایل بورڈ تے زور ݙتا جو کمپنی کوں خود کفیل بݨاوݨ، آپریشنل استعداد بہتر بݨاوݨ، انسانی وسائل دیاں صلاحیتاں وچ ودھارا ، ضیان تے گیس چوری وچ کمی، محصولات دی وصولی تکڑی بݨاوݨ تے وسائل دے بہتر استعمال تے مرکوز ہک جامع کاروباری اصلاحاتی حکمتِ عملی بݨائی ونڄے۔ اجلاس دے دوران سیکرٹری پٹرولیم زور ݙتا جو بورڈ سرکاری ملکیتی اداریں (ایس او ای) ایکٹ دے بنیادی تصور موجب آزادانہ طور تے کم کریندے۔ انہاں آکھیا جو بورڈ کوں آپݨے مینڈیٹ دے تحت اختیارات بروئے کار گھن آندے ایس ایس جی سی ایل دی بہتری، استعداد تے طویل المدتی پائیداری کیتے سارے ضروری اقدامات کرݨے چاہیدن