فیلڈ مارشل عاصم منیر نال کویت دے اعلیٰ سطح وفد دی ملاقات

راولپنڈی ۔27 اگست(اے پی پی)پاک فوج دے شعبہِ تعلقاتِ عامہ (آئی ایس پی آر) دے مطابق کویت دے وزیرِ دفاع شیخ عبداللہ علی عبداللہ السالم الصباح دی قیادت اچ اعلیٰ سطح وفد جی ایچ کیو دا دورہ کیتے۔ کویت دا اعلیٰ سطح وفد وزیرِ دفاع شیخ عبداللہ علی عبداللہ السالم الصباح دی قیادت اچ فیلڈ مارشل سید عاصم منیر نال ملیے۔ کویت دی مسلح افواج دے چیف آف جنرل سٹاف لیفٹیننٹ جنرل خالد درج سعد الشریعان وی موجود ہن۔ ملاقات اچ باہمی دلچسپی دے امور، علاقائی سلامتی اتے ݙو طرفہ دفاعی تعاون تے ڳالھ تھئی۔ فریقین ادارہ جاتی روابط ٻئے مضبوط بݨاوݨ اتے دفاعی تعاون ودھاوݨ دا عزم دوہرایا۔ کویتی وفد علاقائی امن اتے استحکام کیتے پاکستان دیاں مسلح افواج دیاں پیشہ ورانہ مہارت، آپریشنل صلاحیتاں اتے خدمات کوں سراہیا۔ فریقین پاکستان اتے کویت وچال تاریخی اتے برادرانہ تعلقات کوں دفاعی شراکت داری اچ وٹاوݨ دا وی عزم دوہرایا۔