اقوامِ متحدہ، جنرل اسمبلی عالمی سطح تے معاون ٹیکنالوجی تئیں رسائی ودھاوݨ بارے پاکستان دی قیادت اچ پیش کیتی ڳئی قرارداد متفقہ طور تے منظور کر گھدی

اقوام متحدہ۔ 03 ستمبر (اے پی پی) اقوامِ متحدہ دی جنرل اسمبلی دنیا بھر اچ زندگی بدلݨ آلی معاون ٹیکنالوجی، آلات تے خدمات کوں بالخصوص ترقی پذیر ملکاں اچ سستا تے قابلِ رسائی بݨاوݨ بارے پاکستان دی قیادت اچ پیش کیتی ڳئی تاریخی قرارداد متفقہ طور تے منظور کر گھدی، ’’معاون ٹیکنالوجی تئیں رسائی‘‘ دے عنوان نال اے آپݨی نوعیت دی پہلی قرارداد اے، اے اقدام ایں بنیادی اصول دی عالمی سطح تے وسیع حمایت دی عکاسی کریندے جو ٹیکنالوجی دا سب توں وݙا مقصد اوں ویلھے پورا تھیندے ڄݙاں او انسانی صلاحیتاں تے امکانات کوں وسعت ݙیوے۔ اقوامِ متحدہ اچ پاکستان دے مستقل مندوب عاصم افتخار احمد 193 رکنی جنرل اسمبلی اچ قرارداد پیش کریندیں ہوئیں آکھیا جو معاون ٹیکنالوجی اچ وہیل چیئرز، مصنوعی اعضا، سماعت دے آلات، مواصلاتی آلات، سکرین ریڈرز تے ٻئے ڈیجیٹل حل شامل ہن جیڑھے معذور افراد، معمر تے بعض صحت دے مسائل نال دوچار افراد کوں زیادہ خودمختاری تے باوقار زندگی گزارݨ اچ مدد ݙیندن۔ انہاں آکھیا جو اے صرف مصنوعات یا آلات نئی ٻھل انحصار تے خودمختاری، محرومی تے شمولیت تے صلاحیت تے موقعیاں دے درمیان پل دا کردار ادا کر سڳدن، تاں جو دنیا اچ لکھاں افراد ہݨ وی انہاں سہولتاں توں محروم ہن۔ پاکستانی مندوب آکھیا جو دنیا بھر اچ تقریباً 2.5 بلین افراد کوں معاون مصنوعات دی ضرورت اے لیکن لکھاں افراد کوں قیمتاں اچ ودھارے، دستیابی دے مسائل، ٹیکنالوجی تائیں محدود رسائی، ناکافی بنیادی ڈھانچے تے خدمات تے تربیت یافتہ افراد دی کمی سویں رکاوٹاں پاروں مناسب سہولتاں نئی ملدی۔ قرارداد اچ معاون ٹیکنالوجی تائیں رسائی کوں وسیع تر ترقیاتی تے سماجی شمولیت دے ایجنڈے دا حصہ قرار ݙتا ڳیا اتے ایں اچ تعلیم، روزگار، صحت، سماجی تحفظ تے معاشرے اچ بامعنی شرکت کوں تسلیم کیتا ڳیا۔ پاکستان ورلڈ ہیلتھ اسمبلی دی قرارداد 71.8 پیش کرݨ اچ وی اہم کردار ادا کیتا ہئی جیڑھی معاون ٹیکنالوجی تائیں رسائی بہتر بݨاوݨ بارے ہئی اتے 2018 اچ اتفاقِ رائے نال منظور تھئی۔