نائب وزیرِ اعظم سینیٹر محمد اسحاق ڈار دی صدارت سیف گیمز دی تیاریاں بارے سٹیئرنگ کمیٹی دا اجلاس

اسلام آباد۔ 05 ستمبر (اے پی پی) نائب وزیرِ اعظم تے وزیرِ خارجہ سینیٹر محمد اسحاق ڈار سیف گیمز دی تیاریاں بارے سٹیئرنگ کمیٹی دے اجلاس دی صدارت کیتی۔ چھنچھݨ وار کوں دفترِ خارجہ دے مطابق جنوبی ایشیائی اولمپک کمیٹی دے نال رابطے تے مشاورت نال سیف گیمز دے انعقاد دی تاریخاں 4 توں 11 اپریل 2027ء مقرر کر ݙتی ڳئن۔ اجلاس اچ نیشنل کوآرڈینیٹر دی تقرری ڄݙاں جو اسٹیئرنگ، آرگنائزنگ تے صوبائی کمیٹیاں دی تشکیل دی وی منظوری ݙتی ڳئی۔ مجموعی طور تے 28 کھیݙاں دے مقابلے تھیسن ڄنہاں اچ 6 ہزار توں ودھ کھݙاریاں تے آفیشلاں دی شرکت متوقع اے۔ کھیݙاں دے مقابلے اسلام آباد، پنجاب تے خیبر پختونخوا اچ تھیسن۔ نائب وزیرِ اعظم متعلقہ حکام کوں ہدایت کیتی جو آپسی رابطے کوں موثر بݨایا ونڄے، کھیݙاں دے مقاماں دی تیاری بروقت مکمل کیتی ونڄے اتے گیمز دے کامیاب انعقاد کیتے اعلیٰ ترین معیار کوں یقینی بݨایا ونڄے۔ انہاں اسٹیئرنگ کمیٹی کوں پیش رفت دا جائزہ گھنݨ کیتے ہر مہینے اجلاس کرݨ دی وی ہدایت کیتی۔ اجلاس اچ وزیرِ اعظم دے مشیر برائے بین الصوبائی رابطہ، وزیرِ اعظم دے معاونِ خصوصی طارق باجوہ، سیکرٹری آئی پی سی، صوبائی حکومتاں دے نمائندیاں تے وفاقی تے صوبائی حکومتاں دے سینئر حکام شرکت کیتی۔