شہدا دی قربانیاں او مقدس امانت اے ڄیندے بنیاد تے پاکستان دی آزادی، خودمختاری تے سلامتی قائم اے، محمد شہباز شریف

اسلام آباد۔ 06 ستمبر (اے پی پی) وزیرِ اعظم محمد شہباز شریف آکھیا جو یومِ دفاع و شہدا دے موقع تے اساں آپݨے شہدا دی لازوال شجاعت، غازییاں دی بہادری تے انہاں دے اہل خانہ دے غیر متزلزل عزم کوں سلام پیش کریندوں، انہاں دی قربانیاں او مقدس امانت اے ڄیندے بنیاد تے پاکستان دی آزادی، خودمختاری تے سلامتی قائم اے۔ اتوار کوں سماجی رابطے دی ویب سائٹ ایکس تے بیان اچ وزیرِ اعظم آکھیا جو 1965ء دے معرکیاں توں گھن تے معرکہ حق تے آپریشن بنیان مرصوص دی شاندار کامیابی تائیں، اساݙی مسلح افواج ثابت کیتے جو 6 ستمبر دا جذبہ اڄ وی پوری طرحاں زندہ اتے ناقابلِ شکست اے، پوری قوم پاک فوج، پاک فضائیہ تے پاک بحریہ دے بہادر سپوتاں تے دھیاں دے نال فخر دے نال کھڑی اے۔ وزیرِ اعظم آکھیا جو پاکستان امن دا خواہاں اے، تاہم امن کیتے اساݙا عزم کہیں صورت اساݙی کمزوری نہ سمجھیا ونڄے، اساݙے کول آپݨے وطن دے چپے چپے دے دفاع تے ہر قسم دی دہشت گردی تے جارحیت کوں فیصلہ کن شکست ݙیوݨ دا عزم تے صلاحیت ݙوہیں موجود ہن۔ انہاں آکھیا جو آؤ آپݨے شہدا کوں خراجِ عقیدت پیش کریندے ہوئیں ایہو جہا پاکستان تشکیل ݙیووں ڄہڑا متحد، پرامن، معاشی طور تے مضبوط تے قائدِاعظم دے اصولاں ایمان، اتحاد تے نظم و ضبط تے کاربند ہووے۔ اللہ تعالیٰ اساݙے شہدا دے درجات بلند فرماوے اتے اساݙے پیارے وطن پاکستان کوں ہمیشہ آپݨی حفاظت اچ رکھےن٘