6 ستمبر ملکی دفاعی تاریخ دا اہم ڈینہہ اے ڄہرا قوم دے تحفظ کیتے ݙتی ڳئی قربانیاں دی یاد ݙویندے، محسن نقوی

اسلام آباد۔ 06 ستمبر (اے پی پی) وفاقی وزیرِ داخلہ محسن نقوی مسلح افواج، شہدا تے سابق فوجیاں کوں خراجِ تحسین پیش کریندیں ہوئیں آکھیا جو 6 ستمبر ملک دی دفاعی تاریخ دا ہک اہم ڈینہہ اے ڄہرا قوم دے تحفظ کیتے ݙتی ڳئیاں قربانیاں دی یاد ݙویندے۔ وزارتِ داخلہ دی جانب توں یومِ دفاع دے موقع تے جاری سنیھے اچ محسن نقوی آکھیا جو 6 ستمبر 1965ء پاکستان دی تاریخ دا ہک اہم باب اے ڄݙاں ملک دی مسلح افواج عددی اعتبار نال ٻہوں وݙی دشمن قوت دا سامݨا کرݨ دے باوجود کامیابی نال جارحیت دے خلاف وطن دا دفاع کیتا۔ انہاں آکھیا جو اے ڈینہہ مسلح افواج تے پاکستان دے عوام دے حوصلے، عزم تے جذبے دی نمائندگی کریندے۔ وفاقی وزیر انہاں شہدا کوں خراجِ عقیدت پیش کیتا ڄنہاں دی قربانیاں آوݨ آلی نسلاں کوں متاثر کریندن۔ محسن نقوی آکھیا جو 1965ء دی جنگ اچ پاکستانی قوم اتحاد، عزم تے ثابت قدمی دا مظاہرہ کیتا۔ انہاں آکھیا جو تاریخ ݙسیندی اے جو کینویں پورا ملک آپݨی مسلح افواج دی حمایت اچ نال کھڑا تھیا اتے وطن دے دفاع اچ کردار ادا کیتا۔