پاکستان ایئر فورس پورے ملک دی ساری پی اے ایف بیسز تے 7 ستمبر یومِ شہداء دے طور تے منایا

راولپنڈی۔ 07 ستمبر (اے پی پی) پاکستان ایئر فورس (پی اے ایف) پورے ملک دی ساری پی اے ایف بیسز تے 7 ستمبر یومِ شہداء دے طور تے منایا۔  ڄیندا مقصد آپݨے شہداء دیاں عظیم قربانیاں کوں خراجِ عقیدت پیش کرݨ اتے انہاں دی بہادری، شجاعت تے فرض نال بے مثال وابستگی کوں سلام پیش کرݨ ہئی۔ پاک فوج دے شعبہ تعلقات عامہ (آئی ایس پی آر) توں جاری بیان دے مطابق یومِ شہداء دا آغاز 1965ء تے 1971ء دیاں جنگاں دے شہداء، معرکہ حق دے بہادر شہداء تے پاکستان دے قیام توں ڳھن تے ہݨ تائیں فرض دی ادائیگی دے دوران آپݨی جاناں دا نذرانہ پیش کرݨ آلے پاک فضائیہ دے تمام اہلکاراں کیتے خصوصی دعا تے قرآن خوانی نال تھیا۔ پاک فضائیہ دے سربراہ ایئر چیف مارشل ظہیر احمد بابر سدھو اسلام آباد اچ ایئر ہیڈکوارٹرز اچ تھیوݨ آلی یومِ شہداء دی تقریب دے مہمانِ خصوصی ہن۔ ایئر چیف مارشل پاک فضائیہ دے شہداء کوں زبردست خراجِ عقیدت پیش کریندیں ہوئیں آکھیا جو انہاں دیاں قربانیاں پاک فضائیہ دے قابلِ فخر ورثے، بہادری، پیشہ ورانہ مہارت تے وطنِ عزیز دے دفاع کیتے غیر متزلزل عزم دی بنیاد ہن۔ انہاں آکھیا جو اساݙے اسلاف دے بہادرانہ کارنامے محض تاریخ دے باب نئی ٻلکہ ہک زندہ ورثہ ہن ڄہرے موجودہ نسل تے ہک وݙی ذمہ داری عائد کریندن۔ شہداء کوں خراجِ عقیدت پیش کریندیں ہوئیں انہاں آکھیا جو اساݙے شہداء بہادری، قربانی تے قومی عزم دی لازوال علامت ہن، انہاں دی میراث اساکوں یاد ݙویندی اے جو مادرِ وطن دا دفاع ہک مقدس امانت اے ڄیکوں اساں ثابت قدمی تے غیر متزلزل عزم دے نال نبھیندے رہسوں۔ بعد اچ ایئر چیف مارشل یادگارِ شہداء تے پھلاں دی چادر چاڑھی اتے پاک فضائیہ دے بہادر شہداء کیتے فاتحہ خوانی وی کیتی۔