وفاقی وزیر احد چیمہ نال ایشیائی ترقیاتی بینک دے نمائندیں دی ملاقات، ایم ایل ون منصوبے دے ڈیزائن دی وقتی تکمیل دے عزم دا اعادہ

اسلام آباد۔ 09 ستمبر (اے پی پی) وفاقی وزیرِ اقتصادی امور سینیٹر احد چیمہ آکھیے جو وزیرِاعظم محمد شہباز شریف ایم ایل ون منصوبے کوں اہمیت ݙیندے پئن تے چاہندن جو منصوبہ تکھے عملی مرحلے دی پاسے ودھے۔ انہاں اے ڳالھ اتھاں ایشیائی ترقیاتی بینک (اے ڈی بی) دے حکام نال ملاقات اچ آکھی، ملاقات اچ مین لائن ون (ایم ایل ون) ریلوے منصوبے تے پیش رفت دا جائزہ ڳھدا ڳیا تے منصوبے دے ڈیزائن دی وقتی تکمیل تے ایں دے بعد دے تیاری دے مرحلیں تے خصوصی توجہ مرکوز کیتی ڳئی۔ ایشیائی ترقیاتی بینک دے حکام ݙسایا جو ایں دی تکنیکی ٹیم تے منصوبے دے کنسلٹنٹس ایم ایل ون تے سرگرمی نال کم کریندے پئن تے منصوبے دے ڈیزائن کوں اکتوبر دے اندر حتمی شکل ݙیوݨ کیتے ہر ممکن کوشش کیتی ویندی پئی اے۔ اے ڈی بی دی پاسے توں ٻیا ݙسایا ڳیا جو منصوبے دا ڈیزائن حتمی تھیوݨ بعد حکومت دے نال نیڑے رابطے تے تعاون نال خریداری تے ایں دے بعد دے ٻئے مرحلیں کوں وقتی اڳوں ودھاوݨ دی بھرپور کوشش کیتی ویسی۔ سینیٹر احد چیمہ اے ڈی بی تے ایں دی تکنیکی ٹیماں دی پاسے توں تھیوݨ آلی پیش رفت دی تعریف کیتی تے جاری کم دی وقتی تکمیل کیتے سارے متعلقہ فریقاں وچال نیڑے رابطے تے موثر تعاون دی اہمیت تے زور ݙتا۔ وفاقی وزیر آکھیا جو وزیرِاعظم محمد شہباز شریف ایم ایل ون منصوبے کوں اہمیت ݙیندن تے چاہندن جو منصوبہ تکھے عملی مرحلے دی پاسے ودھے۔ انہاں اے ڈی بی دے وفد کوں یقین ݙوایا جو حکومتِ پاکستان اپݨے پاسوں سارے ضروری تقاضیں کوں وقتی پورا کرݨ کیتے مکمل طور تے تیار اے تے منصوبے دے سارے مرحلیں اچ ضروری سہولت تے تعاون ݙیسی۔ وفاقی وزیر منصوبے دے عملی شیڈول دا مسلسل جائزہ گھنݨ دی لوڑھ تے وی زور ݙتا تاں جو جتھاں ممکن ہووے، سارے تکنیکی، قانونی تے ضابطہ جاتی تقاضیں دی مکمل پاسداری کریندے منصوبے دی مدت کوں ٻیا بہتر تے موثر بݨایا ونڄ سڳے۔ اے ڈی بی دے نمائندیں منصوبے کوں اڳوں ودھاوݨ کیتے حکومتِ پاکستان دے عزم تے کوششاں کوں چنڳاں اکھیندے یقین ݙیوائے جو ایشیائی ترقیاتی بینک منصوبے تے وقتی پیش رفت یقینی بݨاوݨ کیتے حکومت دے نال نیڑے تعاون جاری رکھیسی۔