پاکستان دا مقبوضہ فلسطینی علاقے اچ غیرقانونی وستیاں اچ بݨݨ آلی مصنوعات تے پابندی لاوݨ دے برطانوی فیصلے دا خیرمقدم

اسلام آباد۔ 09 ستمبر(اے پی پی) پاکستان برطانیہ دی طرفوں مقبوضہ مغربی کنارے اچ غیر قانونی اسرائیلی وستیاں اچ بݨݨ آلی مصنوعات تے پابندی لاوݨ دے فیصلے دا خیرمقدم کیتے۔ ترجمان وزارتِ خارجہ آپݨے بیان اچ آکھیے مقبوضہ فلسطینی علاقے اچ غیر قانونی وستیاں دا مسلسل کھنڈݨ بین الاقوامی قانون تے اقوامِ متحدہ دی سلامتی کونسل دیاں متعلقہ قرارداداں دی کھلی خلاف ورزی اے، ایویں غیرقانونی کارروائیاں ݙو ریاستی حل دے حصول تے خطے اچ امن و استحکام کیتے بین الاقوامی کوششاں کوں ضیان پڄیندیاں پئن۔ ایں سلسلے اچ پاکستان کینیڈا، ڈنمارک، فن لینڈ، فرانس، آئس لینڈ، آئرلینڈ، ناروے، پولینڈ، پرتگال، سپین تے سویڈن سودھے ٻہوں سارے ملکاں دے اعلانات دا وی خیرمقدم کریندے ڄہڑے اسرائیلی غیر قانونی وستیاں دے خلاف ایہوجیھے ہی اقدامات تے غورکریندے پئن تے انہاں کوششاں دی حمایت کریندے پئن۔ پاکستان امید کریندوں جو اے اقدامات مقبوضہ فلسطینی علاقے اچ غیر قانونی کارروائیاں کوں مسترد کرݨ دا ہک واضح تے غیرمبہم پیغام ݙیسن۔ پاکستان ہمیشہ فلسطینی عوام دے حقِ خودارادیت کیتے انہاں دی جائز جدوجہد دی حمایت کیتی اے تے اڳوں وی کریندا رہسی تے انہاں ساریاں کوششاں دی حمایت جاری رکھیسی ڄہڑیاں 1967ء توں پہلے دیاں سرحداں تے مبنی ہک خودمختار، آزاد تے متصل فلسطینی ریاست دے قیام کیتے ہن جیندا دارالحکومت القدس الشریف ہووے۔