شہریاں کوں ٹیکس سال 2026ء کیتے انکم ٹیکس گوشوارے 30 ستمبر تئیں لازمی جمع کراوݨ دی ہدایت

اسلام آباد۔ 14 ستمبر (اے پی پی) فیڈرل بورڈ آف ریونیو (ایف بی آر) شہریاں کوں ٹیکس سال 2026ء کیتے انکم ٹیکس گوشوارے 30 ستمبر تئیں لازمی جمع کراوݨ دی ہدایت کیتی اے- ایف بی آر موجب شہری ٹیکس سال 2026ء کیتے انکم ٹیکس گوشوارے 30 ستمبر تئیں جمع کراوݨ کیتے ایف بی آر دی ویب سائٹ یا ٹیکس آسان ایپ استعمال کرن- رہنمائی کیتے ایف بی آر دی ہیلپ لائن یا نیڑے دے دفتر نال رجوع کیتا ونڄ سڳدے-ایف بی آر موجب فائلر بݨݨ نال ٻہوں فیدہ چاتا ونڄ سڳدے، فائلراں کیتے بینک توں نقد رقم نکلواوݨ تے کوئی ٹیکس کائنی ڄݙاں جو گاݙی دی خریداری تے نان فائلر دے مقابلے اچ ہک تہائی ٹیکس اچ سہولت ݙتی ویندی اے- ایویں جائیداد دی خرید و فروخت تے نان فائلر دے مقابلے اچ ہک تہائی گھٹ ٹیکس ݙیوݨاں پوندے- فائلراں کیتے قومی بچت دیاں سکیماں تے بینک منافع تے نان فائلر دے مقابلے اچ ادھے ٹیکس ڄݙاں جو ودھ ݙتے ڳئے یا وضع کیتے ڳئے ٹیکس دی ایڈجسٹمنٹ تے ریفنڈ دا قانونی حق وی حاصل تھیندے-