وفاقی وزیرِاحسن اقبال دا ایس سی او ڈیجیٹل اکانومی تعاون دے وزارتی اجلاس توں خطاب، ڈیجیٹل رابطیں دے ودھارے تے زور

ارومچی۔ 14 ستمبر (اے پی پی) وفاقی وزیرِ منصوبہ بندی، ترقی و خصوصی اقدامات احسن اقبال آکھیے جو ڈیجیٹل معیشت پاکستان دے ترقیاتی ایجنڈے دا مرکز اے، پاکستان تے چین سودھے ایس سی او ملکاں وچال مصنوعی ذہانت، کلاؤڈ کمپیوٹنگ، سائبر سکیورٹی، تحقیق تے ڈیجیٹل رابطیں دے شعبیں اچ تعاون دے وسیع موقع موجود ہن۔ وفاقی وزیر ݙو ݙینھ دے سرکاری دورے تے چین دے شہر ارومچی پڄ ڳئن جتھاں انہاں ڈیجیٹل اکانومی فورم اچ شرکت کیتی۔ وفاقی وزیر ایس سی او ڈیجیٹل اکانومی تعاون دے وزارتی سطح دے اجلاس توں خطاب کریندے آکھیا جو ڈیجیٹل معیشت پیداوار، تجارت، طرزِ حکمرانی تے انسانی ترقی دی رفتار تکھی کرݨ دا اہم ذریعہ اے۔ انہاں آکھیا جو ای-پاکستان، اڑان پاکستان دے پنج بنیادی ستوناں اچ شامل اے ڄݙاں جو ڈیجیٹل تبدیلی پاکستان دے ترقیاتی ایجنڈے دا مرکز اے۔ ڈیجیٹل نیشن پاکستان ایکٹ، پاکستان ڈیجیٹل اتھارٹی تے قومی مصنوعی ذہانت پالیسی ڈیجیٹل تبدیلی دی بنیاد ہن۔ احسن اقبال آکھیا جو پاکستان تے چین وچال مصنوعی ذہانت، کلاؤڈ کمپیوٹنگ، سائبر سکیورٹی، تحقیق تے ہنرمندی دے شعبیں اچ تعاون دے وسیع موقع موجود ہن ڄنہاں توں ݙوہیں ملکاں دے عوام بالخصوص نوجوان نسل مستفید تھی سڳدی اے۔ انہاں ایس سی او ڈیجیٹل کنکٹیویٹی اینڈ کمپیوٹ کوریڈور دے قیام دی تجویز پیش کریندے سرحد پار فائبر رابطیں، ڈیٹا سینٹرز تے سیٹلائٹ رابطیں کوں ودھاوݨ تے زور ݙتا۔ وفاقی وزیر آکھیا جو ڈیجیٹل تعاون اچ اعتماد، رازداری، سائبر سکیورٹی، شفافیت تے قومی خودمختاری دے اصولاں کوں مقدم رکھیا ونڄݨاں چاہیدے۔ انہاں آکھیا جو پاکستان ایس سی او دی ڈیجیٹل شراکت داری کوں عملی نتیجے اچ بدلݨ کیتے پرعزم اے، رابطہ کاری، جدت تے مشترکہ خوشحالی کوں ودھاراݙیسوں۔ احسن اقبال زور ݙتا جو ڈیجیٹل بنیادی ڈھانچے دے ثمرات صرف حکومتاں تے وݙیاں کمپنیاں تئیں محدود نی ہووݨے چاہیدے بلکہ نوجواناں، تریمتاں، جامعات تے چھوٹے کاروباراں کوں وی ڈیجیٹل معیشت اچ اڳوں ودھݨ دے مساوی موقع ݙتے ونڄݨے چاہیدن۔