جمہوریت آزادی، مساوات تے اجتماعی فیصلہ سازی تے مبنی نظامِ حکومت اے، سردار ایاز صادق

اسلام آباد۔ 14 ستمبر (اے پی پی) سپیکر قومی اسمبلی سردار ایاز صادق آکھیے جو جمہوریت نظامِ حکومت اچ عوامی شمولیت دا ناں اے، جمہوریت آزادی، مساوات تے اجتماعی فیصلہ سازی تے مبنی نظامِ حکومت اے، جمہوری نظام دی مضبوطی دا انحصار عوامی رائے دا احترام، قومی معاملات اچ شفافیت، جوابدہی تے قانون دی حکمرانی کوں یقینی بݨاوݨ تے اے۔ اے ڳالھ انہاں عالمی یومِ جمہوریت دے موقع تے آکھی جیڑھا ہر سال 15 ستمبر کوں اقوامِ متحدہ دے زیرِ اہتمام دنیا اچ منایا ویندے۔ سپیکر قومی اسمبلی ملک اچ جمہوریت دی بحالی تے جمہوری اداریں دے استحکام کیتے قربانیاں ݙیوݨ آلے قائدین تے سیاسی کارکناں کوں خراجِ تحسین پیش کریندے آکھیا جو پاکستان دی تاریخ جمہوری جدوجہد، آئینی بالادستی تے عوامی نمائندگی کیتے ݙتیاں ونڄݨ آلیاں قربانیاں نال بھری پئی اے۔ سپیکر سردار ایاز صادق آکھیا جو پارلیمان جمہوری نظام دا بنیادی ستون تے عوامی امنگاں دا نمائندہ ادارہ اے جتھاں عوام دے منتخب نمائندے عوام دی فلاح و بہبود کیتے قانون سازی کریندن۔ انہاں آکھیا جو اختلافِ رائے جمہوریت دا حسن اے تاں جو اختلافات کوں برداشت، مکالمے تے مشاورت دے ذریعے حل کرݨ جمہوری اقدار دے ودھارے کیتے ضروری اے۔ سپیکر سردار ایاز صادق آکھیا جو ملک اچ موثر جمہوری نظام کیتے صرف انتخابی عمل کافی کائنی بلکہ عوام دی مسلسل تے بامعنی شرکت تے فیصلہ سازی اچ معاشرے دے سارے طبقات دی رائے دا احترام ضروری اے۔ انہاں آکھیا جو تریمتاں، نوجواناں، اقلیتاں تے معاشرے دے ٻئے طبقے دی سیاسی تے پارلیمانی عمل اچ موثر شمولیت جمہوریت کوں تکڑا بݨیندی اے۔ سپیکر سردار ایاز صادق آکھیا جو پارلیمان عوام تے ریاستی اداریں وچال موثر رابطے دا اہم ذریعہ اے تے قومی اسمبلی عوامی مسئلیں کوں قانون سازی تے پارلیمانی نگرانی دے ذریعے حل کرݨ اچ فعال کردار ادا کریندی پئی اے۔ انہاں آکھیا جو پارلیمانی کمیٹیاں، پارلیمانی کاکسز تے مختلف مشاورتی پلیٹ فارمز دے ذریعے ارکانِ پارلیمان کوں اہم قومی و عوامی امور تے مکالمے تے مشترکہ غور و خوض دے موقع ݙتے ویندن۔ سپیکر سردار ایاز صادق آکھیا جو نوجوان نسل پاکستان دے روشن مستقبل دی ضمانت اے، نوجواناں کوں پارلیمانی نظام، آئینی اقدار تے جمہوری طریقہ کار نال روشناس کراوݨ تے انہاں کوں قومی فیصلہ سازی دے عمل اچ موثر کردار دے موقع ݙیوݨ ناگزیر اے۔ انہاں مزید آکھیا جو قومی اسمبلی اچ یونیورسٹی دے طلبہ کوں قانون سازی تے پارلیمانی امور نال روشناس کراوݨ کیتے یوتھ انٹرن شپ پروگرام دا اجراء کیتا ڳئے۔ سپیکر قومی اسمبلی آکھیا جو اڄوکا ݙینھ اساکوں جمہوری اداریں کوں مستحکم، آئینی نظام کوں مضبوط تے سیاسی مکالمے کوں ودھارا ݙیوݨ دے عزم دا اعادہ کرݨ دا موقع ݙیندے۔ انہاں ساری سیاسی قوتاں کوں اختلافات بھلا تے قومی اہمیت دے حامل معاملات تے عوام کوں درپیش مسئلیں دے حل کیتے کردار نبھاوݨ دی لوڑھ تے زور ݙتا۔ ایں موقع تے ڈپٹی سپیکر قومی اسمبلی سید غلام مصطفیٰ شاہ آکھیا جو جمہوریت عوام دے حقِ حکمرانی تے سیاسی آزادیاں دے تحفظ دی ضامن اے۔ انہاں آکھیا جو مضبوط پارلیمان، آئین دی بالادستی تے قانون دی حکمرانی جمہوری معاشرے دی بنیادی ضرورتاں ہن تے ملک دی ترقی، خوشحالی تے استحکام کیتے جمہوری اداریں کوں تکڑا بݨاوݨ ناگزیر اے۔ انہاں آکھیا جو قائدِ عوام شہید ذوالفقار علی بھٹو تے شہید محترمہ بے نظیر بھٹو ملک اچ جمہوریت دی بحالی تے استحکام کیتے جہڑی جدوجہد کیتی تے قربانیاں ݙتیاں، او ناقابلِ فراموش ہن۔ ڈپٹی سپیکر آکھیا جو سیاسی اختلافات کوں مکالمے، مشاورت تے پارلیمانی طریقہ کار دے ذریعے حل کرݨ جمہوری نظام دی مضبوطی کیتے ضروری اے۔ انہاں عوامی مسئلیں دے حل تے ملکی ترقی کیتے جمہوری اقدار کوں ودھاوݨ دی لوڑھ تے زورݙتا۔