این ڈی ایم اے دا خطہ پوٹھوہار تے اُتلے خیبر پختونخوا اچ آندے مینھ دا الرٹ جاری

اسلام آباد۔ 14 ستمبر(اے پی پی) نیشنل ڈیزاسٹر مینجمنٹ اتھارٹی (این ڈی ایم اے) دے نیشنل ایمرجنسیز آپریشن سینٹر (این ای او سی) دی طرفوں خطہ پوٹھوہار تے اُتلے خیبر پختونخوا اچ آندے مینھ دا الرٹ جاری کر ݙتا ڳئے، این ای او سی توں جاری الرٹ موجب 14 توں 17 ستمبر تئیں خطہ پوٹھوہار تے اُتلے خیبر پختونخوا اچ کھمݨ گاجاں نال مینھ دا امکان اے ۔ این ڈی ایم اے توں جاری بیان موجب اسلام آباد، راولپنڈی، اٹک، چکوال، جہلم، مری، گلیات تے ملحقہ پہاڑی علاقیں اچ کھمݨ گاجاں نال مینھ وسݨ دا امکان اے جݙاں جو آندے مینھ پاروں نشیبی علاقیں، ندی نالیں تے شہری علاقیں اچ مقامی سطح تے چھل دی صورتحال پیدا تھیوݨ دا ݙر اے۔ اُتلے خیبر پختونخوا دے اضلاع دیر، سوات، بونیر، مالاکنڈ، شانگلہ، بٹگرام، کوہستان، مانسہرہ، ایبٹ آباد، ہری پور، نوشہرہ، صوابی، مردان، پشاور تے نیڑے علاقیں اچ وی زور دامینھ وسݨ دا امکان اے ۔ این ای او سی دے جائزہ ماڈلز اچانک بݨݨ آلے موسمی نظام دے نتیجے اچ مختصر دورانیے اچ شدید بارش دی نشاندہی کریندے پئن۔ پہاڑی علاقیں اچ زور دے مینھ پاروں ندی نالیاں اچ تکھے پاݨی وہݨ ، مقامی چھل تے لینڈ سلائیڈنگ دا خطرہ ودھ سڳدے۔ عوام مینھ اچ ندی نالیں تے پاݨی دیاں جہیں توں پرے رہن تے غیر ضروری سفر نہ کرن ۔ عوام ممکنہ چھل دی صورتحال تے لینڈ سلائیڈنگ دے خطرے پاروں محتاط رہن، مقامی انتظامیہ، محکمہ موسمیات تے این ڈی ایم اے دی طرفوں جاری کیتے ڳئے تازہ ترین موسمی و ہنگامی ہدایات تے عمل کرن۔ مستند موسمی معلومات، ممکنہ خطرات تے احتیاطی تدابیر کیتے پاک این ڈی ایم اے ڈیزاسٹر الرٹ موبائل ایپ توں رہنمائی گھنن۔