وزیراعظم فیول ریلیف اسکیم، پٹرول تے 100 روپے فی لیٹر سبسڈی، بائیک و رکشے کیتے ماہانہ 20 تے 800 سی سی گاݙیاں کیتے 30 لیٹر پٹرول ݙتا ویسی۔ شزہ فاطمہ

اسلام آباد۔ 14 ستمبر (اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ آکھیے جو وزیراعظم دی خصوصی پٹرول ریلیف اسکیم کوں اہل گاݙی مالکان تے صارفین دی سہولت کیتے نویں سروں بݨایا ڳئے ، جیندے اچ روزگار کیتے استعمال تھیوݨ آلے موٹر سائیکلاں تے رکشیں دا استعمال کرݨ آلے محنت کشاں کوں وی شامل کرڳھدا ڳئے۔ وفاقی وزیر اطلاعات و نشریات عطا اللہ تارڑ تے وفاقی وزیر پٹرولیم علی پرویز ملک دے رلے پریس کانفرنس توں خطاب کریندے ہوئیں انہاں آکھیا جو حکومت پروگرام دے گزریل مرحلے دے تجربیں دا جائزہ گھن تے عوام کیتے رجسٹریشن دا طریقہ کار سوکھا بݨائے، کیوں جو پچھلے مرحلے اچ صرف مالکان دے ناں تے موٹر سائیکلاں رجسٹرڈ تھیوݨ دی شرط پاروں رجسٹریشن دی شرح گھٹ رہی ہئی۔ شزہ فاطمہ دا آکھݨ ہئی جو روزگار کیتے کرائے دی موٹر سائیکلاں تے رکشے چلاوݨ آلیاں کیتے ہݨ گاݙی دی ملکیت لازمی شرط نہ ہوسی، البتہ 800 سی سی گاݙی تے رعایت حاصل کرݨ کیتے ملکیت ہووݨ ضروری اے۔ انہاں وضاحت کیتی جو ملک اچ ٻہوں گاݙیاں اوپن ٹرانسفر لیٹر تے چلدیاں پئن جݙاں جو کئی گاݙیاں گھن تے اہلخانہ یا عملے دے حوالے کر ݙتیاں ویندن، ایویں وݙی تعداد اچ محنت کش اپݨی روزی روٹی کماوݨ کیتے کرائے دے رکشے تے موٹرسائیکل چلیندن۔ وفاقی وزیر آکھیا جو وزیراعظم پروگرام دا تفصیلی جائزہ گھن تے واضح ہدایت ݙتی اے جو عوام کوں ریلیف دے حصول توں غیر ضروری طور تے محروم نہ رکھیا ونڄے، تاں جو عوامی فنڈز دے غلط استعمال کوں روکݨ تے اصل حقداراں دے تحفظ کیتے بنیادی تصدیقی تقاضے برقرار رکھیے ڳئن۔ موجودہ طریقہ کار دے تحت درخواست دہندگان کوں 9771 تے چار بنیادی معلومات بھیجݨیاں ہوسن جنہاں اچ شناختی کارڈ نمبر، گاݙی دی نمبر پلیٹ، رجسٹریشن دا صوبہ تے رجسٹریشن دی تاریخ شامل اے۔ شزہ فاطمہ ݙسایا جو پہلی تصدیق توں اے پتہ کیتا ویسی جو جئیں سم توں میسج بھیجا ڳئے او ایں شناختی کارڈ تے رجسٹرڈ اے یا کائناں، تاں جو کوئی شخص کہیں ٻئے دے شناختی کارڈ تے ٹوکن جاری نہ کروا سڳے۔ ٻئی تصدیق گاݙی دی نمبر پلیٹ، صوبے تے تاریخ دی ہوسی؛ چونکہ ہر صوبے دا ایکسائز ڈیپارٹمنٹ تے اسلام آباد، آزاد کشمیر و گلگت بلتستان اپݨی رجسٹریشن دا انج ڈیٹا رکھیندن ایں کیتے ہک ہی نمبر مختلف صوبیں اچ تھی سڳدے، چنانچہ صوبے دی درست نشاندہی ضروری اے تاں جو ڈیٹا متعلقہ محکمے توں فوری تصدیق تھی سڳے۔ ایں اسکیم دے تحت موٹر سائیکل، رکشہ، چنگچی تے 800 سی سی تئیں دی گاݙیاں دے مالکان و صارفین کوں پٹرول تے 100 روپے فی لیٹر رعایت ݙتی ویسی۔ موٹر سائیکل تے چنگچی کیتے ماہانہ 20 لیٹر جݙاں جو 800 سی سی تئیں دی گاݙیاں کیتے ماہانہ 30 لیٹر رعایتی کوٹہ مقرر کیتا ڳئے۔ رجسٹریشن کیتے شہریاں کوں اپݨے ناں تے رجسٹرڈ سم توں بغیر ڈیش دے شناختی کارڈ نمبر، بغیر اسپیس یا ڈیش دے گاݙی دا نمبر، صوبائی کوڈ تے رجسٹریشن دی تاریخ لکھ تے REG دے نال 9771 تے ایس ایم ایس بھیجݨاں ہوسی۔ رجسٹریشن دی تصدیق دے بعد ڄݙاں وی پٹرول گھنݨاں مقصود ہووے تاں شہری 9771 تے TOK لکھ تے ایندھن دا ٹوکن حاصل کریسی، جئیں کوں پٹرول پمپ تے ݙکھا تے تصدیق دے بعد رعایتی ایندھن ݙتا ویسی۔ وفاقی وزیر اعتراف کیتا جو ابتدائی طور تے ڈیٹا درج کرݨ اچ شہریاں کوں کجھ دشواری پیش آسڳدی اے، لیکن بوگس رجسٹریشن تے ٻیاں دی گاݙیاں تے ریلیف دے غلط استعمال کوں روکݨ کیتے اے جانچ پڑتال ناگزیر اے۔ انہاں واضح کیتا جو اسکیم دا ڈیجیٹل طریقہ کار ایں انداز اچ ڈیزائن کیتا ڳئے جو شہریاں کوں انٹرنیٹ یا اسمارٹ فون دی ضرورت نہ پووے، بلکہ سادہ ایس ایم ایس دے ذریعے عام فون رکھݨ آلے لوک وی یکساں مستفید تھی سڳن۔ ایں توں علاوہ پمپس تے کہیں وی تکنیکی یا کنیکٹیویٹی دے مسئلے کوں فوری حل کرݨ کیتے ہک مخصوص ہیلپ لائن تے وزارتِ پٹرولیم دے تعاون نال انڄ کال سینٹر وی مکمل فعال کر ݙتا ڳئے۔