عوام کوں مہانگ توں بچاوݨ کیتے فی لیٹر 100 روپے پٹرول سبسڈی دا وݙا ریلیف پیکیج گھن آیوں، ماہانہ سبسڈی 25 توں 30 ارب تئیں ہوسی ، وفاقی وزیرِ پٹرولیم علی پرویز ملک

اسلام آباد۔ 14 ستمبر (اے پی پی) وفاقی وزیر پٹرولیم علی پرویز ملک آکھیے جو مشرقِ وسطیٰ تے خطے اچ جنگی کشیدگی پاروں عالمی منڈی اچ برینٹ خام تیل دیاں قیمتاں 64 ڈالر توں ودھ تے 104 ڈالر فی بیرل توں تجاوز کر چکئن پر درآمدی ایندھن تے انحصار تے شدید مالیاتی دٻاؤ دے باوجود حکومت عام آدمی تے ٻوجھ پاوݨ دی بجائے فی لیٹر 100 روپے دی براہِ راست کیش سبسڈی ݙیوݨ دا تاریخی فیصلہ کیتے، قومی خزانے تے باری مالی ٻوجھ دے باوجود وزیراعظم دی خصوصی ہدایت تے سبسڈی دی اے خطیر رقم ٹارگٹڈ انداز اچ مختص کیتی ڳئی اے تاں جو موٹر سائیکل، رکشہ، چنگچی تے 800 سی سی تائیں گاݙی چلاوݨ آلے محنت کش تے سفید پوش طبقے کوں عالمی سطح تے ودھدیاں پٹرولیم قیمتاں دے براہِ راست اثرات توں محفوظ رکھیا ونڄ سڳے۔ وفاقی وزیرِ اطلاعات و نشریات عطاء اللہ تارڑ تے وفاقی وزیرِ آئی ٹی و ٹیلی کام شزہ فاطمہ خواجہ دے رلےپریس کانفرنس توں خطاب کریندے انہاں آکھیا جو بین الاقوامی منڈی اچ خام تیل مسلسل مہانگا تھیوݨ پاروں پٹرولیم مصنوعات دیاں قیمتاں اچ مجبوری دے تحت ودھارا کرݨاں پوندے جئیں دا سامݨا پوری دنیا کوں اے ، تاں جو پاکستان دی حکومت اپݨے محدود وسائل اچ توازن قائم کریندے ٹو ویلرز، تھری ویلرز تے چھوٹیاں گاݙیاں دے صارفین کیتے اے ریلیف سکیم باقاعدہ لانچ کیتی اے۔ انہاں واضح کیتا جو گزریل سکیم دے تلخ تجربیں توں سکھدے ایں واری رجسٹریشن دیاں شرطاں کوں سوکھا بݨایا ڳئے، ماضی اچ صرف گاݙی تے موٹر سائیکل دے اصل مالکان کوں رجسٹر کیتا ڳیا ہئی جئیں پاروں رجسٹریشن دا تناسب گھٹ ریہا کیوں جو ملک اچ اکثر لوگ اوپن ٹرانسفر لیٹرز تے گاݙیاں چلیندن یا ہک بھرا ٻئے دی بائیک استعمال کریندے تے محنت کش رکشے و موٹر سائیکلاں کرائے تے گھن تے روزی کمیندن، ایں کیتے ہݨ گاݙی دے اصل مالک دی بجائے اونکوں چلاوݨ آلے صارف کوں وی سبسڈی حاصل کرݨ دا مکمل حق ݙے ݙتا ڳئے۔ علی پرویز ملک سبسڈی دے شفاف تے فول پروف طریقہ کار تے روشنی پیندے آکھیا جو قومی خزانے تے عوامی پیسے دے تحفظ کیتے سسٹم اچ بنیادی تصدیقی چیکس رکھئے ڳئن تاں جو کوئی غیر متعلقہ شخص کہیں دا حق نہ مار سڳے۔ شہری اپݨے ناں تے رجسٹرڈ موبائل سم توں 9771 تے چار بنیادی معلومات بھیڄ تے باآسانی رجسٹر تھی سڳدن ڄنہاں اچ شناختی کارڈ نمبر، گاݙی دی نمبر پلیٹ، او صوبہ جتھاں گاݙی رجسٹرڈ اے تے گاݙی یا بائیک دی رجسٹریشن دی تاریخ شامل اے۔ انہاں وضاحت کیتی جو درخواست گزار دے اپݨے شناختی کارڈ تے رجسٹرڈ موبائل نمبر دی تصدیق ایں کیتے لازمی رکھی ڳئی اے تاں جو کوئی شخص کہیں ٻئے دا شناختی کارڈ استعمال کر تے فیول ٹوکن چوری نہ کر سڳے ڄݙاں جو متعلقہ صوبے تے رجسٹریشن دی تاریخ دا اندراج ایں کیتے ضروری قرار ݙتا ڳئے جو ہر صوبے، آزاد کشمیر تے گلگت بلتستان دا ایکسائز ڈیٹا انڄ انڄ اے تے رجسٹریشن دی درست تاریخ دا ہووݨ ایں ڳالھ دا ٹھوس ثبوت اے جو صارف کنے گاݙی دے اصل دستاویزات موجود ہن تے مالک دی رضامندی حاصل اے۔ وفاقی وزیر ایں عزم دا اعادہ کیتا جو اے کثیر ارب روپے دا ریلیف پروگرام پوری شفافیت تے سادگی دے نال حقیقی مستحقین تئیں ایندھن دی بچت تے مالی ریلیف منتقل کرݨ اچ سنگِ میل ثابت تھیسی۔