قلات، پاکستان ہائی وے تے سکیورٹی فورسز کارروائی اچ فتنہ الہندوستان دے 5 دہشت گرد ہلاک، 23 مغوی بازیاب

راولپنڈی۔20 ستمبر (اے پی پی) سکیورٹی فورسز قلات دے نیڑے پاکستان ہائی وے (این-25) تے دہشت گرداں دا اغوا، بھتہ خوری تے گاݙیاں کھسݨ دا منصوبہ ناکام بݨیدے بھارتی سرپرستی اچ سرگرم “فتنہ الہندوستان” دے پنج دہشت گرداں کوں جہنم واصل کر ݙتے، کارروائی دے دوران 23 مغویاں کوں بحفاظت بازیاب کروا تے کھسی ڳئی 11 گاݙیاں تے بھاری اسلحہ برآمد کر ڳھدا ڳیا۔ آئی ایس پی آر موجب 18 تے 19 ستمبر 2026ء دی وچلی رات فتنہ الہندوستان نال تعلق رکھݨ آلے دہشت گرداں قلات دے نیڑے پاکستان ہائی وے (چمن توں کراچی، این-25) تے پرامن آونڄ اچ خلل پاوݨ دی کوشش کیتی جتھاں انہاں تاوان کیتے اغوا، بھتہ خوری تے گاݙیاں کھسݨ دی غرض نال ناکہ قائم کیتا ہئی۔ سکیورٹی فورسز فوری ایکشن ڳھدا تے شدید فائرنگ دے تبادلے دے بعد مسلح افواج دی موثر کارروائی دے نتیجے اچ بھارتی سرپرستی اچ کم کرݨ آلی پراکسی فتنہ الہندوستان دے پنج دہشت گرداں کوں جہنم واصل کر ݙتا۔ سکیورٹی فورسز دہشت گرداں دے ٹھکانے توں 23 مغویاں کوں وی بازیاب کروا ڳھدا، ایں دے علاوہ دہشت گرداں دے ٹھکاݨے توں باری مقدار اچ اسلحہ، گولہ بارود تے بارودی مواد دے نال 6 ٹرک، 3 بساں تے 2 کاراں وی برآمد کیتیاں ڳئن۔ سکیورٹی فورسز دے کامیاب آپریشن دے نتیجے اچ بھارتی سرپرستی اچ کم کرݨ آلی پراکسی فتنہ الہندوستان دے مذموم عزائم کوں مٹی اچ ملا ݙتا ڳیا۔ علاقے اچ موجود ٻئے ممکنہ دہشت گرداں دے خاتمے، مقامی آبادی دے تحفظ تے اہم قومی شاہراہواں دی حفاظت و سکیورٹی کوں یقینی بݨاوݨ کیتے سرچ تے کلیئرنس (سینیٹائزیشن) آپریشن جاری اے۔ آئی ایس پی آر دا آکھݨ اے جو نیشنل ایکشن پلان دے تحت وفاقی ایپکس کمیٹی دے منظور کیتے ڳئے وژن “عزمِ استحکام” دے تحت دہشت گردی دے خلاف بلا تعطل مہم پوری قوت تے عزم دے نال جاری رہسی۔ سکیورٹی فورسز تے قانون نافذ کرݨ آلے ادارے ملک توں ٻاہرلی فنڈنگ تے پشت پناہی نال کھنڈائی ونڄݨ آلی دہشت گردی دی لعنت دے مکمل خاتمے کیتے پرعزم ہن