وفاقی وزیرِ اطلاعات عطاء اللہ تارڑ دی کوہاٹ واقعہ اچ شہید پولیس اہلکار فہیم اللہ دے اہلخانہ کوں پرچاوݨی

کوہاٹ۔21 ستمبر(اے پی پی)وفاقی وزیرِ اطلاعات و نشریات عطاء اللہ تارڑ کوہاٹ واقعہ اچ شہید تھیوݨ والے ترائے ٻیݨیں دے کلہے ٻھرا پولیس اہلکار فہیم اللہ دے گھر ڳئے جتھاں انہاں شہید دے والد اکرام اللہ نال ملین اتے شہید فہیم اللہ دے ایصالِ ثواب کیتے فاتحہ خوانی کیتی۔ وفاقی وزیرِ اطلاعات شہید دے اہلخانہ نال دلی ہمدردی اتے تعزیت کریندے آکھیا جو پاکستانی قوم فہیم اللہ ڄھیں بہادر جواناں دیاں قربانیاں کݙاھیں نا ٻھلسی۔ انہاں آکھیا جو شہداء ملک دے امن اتے سلامتی کیتے اپݨیاں جاناں وارین، انہاں دیاں قربانیاں نا ونڄیسن، شہداء دے اہلخانہ کوں کلہا نا چھوڑیا ویسی۔ وفاقی وزیر آکھیا جو دہشتگردی دے خلاف جنگ اچ پوری قوم قانون نافذ کرݨ والے اداریاں دے بہادر اہلکاراں دے نال کھڑی اے۔ وفاقی وزیرِ اطلاعات شہید فہیم اللہ دے ایصال ثواب اتے اہلخانہ کیتے صبرِ دی دعا کیتی۔