سکیورٹی فورسز دا کوہاٹ، ہنگو اتے افغانستان نال جڑے سرحدی علاقیاں اچ آپریشن، کئی دہشتگرد ماریے ڳئن، وزارتِ اطلاعات و نشریات

اسلام آباد۔21 ستمبر(اے پی پی)وزارتِ اطلاعات و نشریات آکھیے جو خیبر پختونخوا اچ اڄوکے کئی دہشتگرد واقعات توں بعد سکیورٹی فورسز کوہاٹ، ہنگو اتے ٹل دے علاقیاں اچ منظم انٹیلی جنس بیسڈ آپریشن کیتے ڄیندے بعد انہاں حملیاں اچ ملوث دہشتگرد تنظیماں دے ٹھکاݨیاں اتے محفوظ کمیں گاہواں تے ٹارگٹڈ فضائی کارروائیاں کیتیاں ڳئن۔ وزارتِ اطلاعات و نشریات سماجی رابطے دے پلیٹ فارم “ایکس” تے آکھیے جو 20 ستمبر 2026ء کوں سکیورٹی فورسز خیبر پختونخوا دے اضلاع کوہاٹ اتے ہنگو اچ دہشتگرداں دے ہک گروہ دے خلاف انٹیلی جنس بیسڈ گراؤنڈ آپریشن کیتا۔ کارروائی اچ بھارتی پراکسی فتنۃ الخوارج دے 9 خوارج ہلاک ڄݙاں جو کئی زخمی تھئن۔

قابلِ اعتماد انٹیلی جنس اطلاعات دی بنیاد تے افغانستان نال ملحقہ سرحدی علاقے اچ فتنۃ الخوارج اتے ایںدیاں تنظیماں دے دہشتگرد کیمپاں اتے ٹھکاݨیاں کوں وݙی درستگی نال نشانہ ٻݨایا ڳیا۔ 3 اہداف کوں درست نشانہ ٻݨا تے تباہ کیتا ڳیا ڄنہاں اچ خودکش بمباراں دا تربیتی مرکز وی شامل ہئی۔ کارروائی اچ 28 دہشتگرداں سودھا کئی خودکش بمبار ہلاک تھئن ڄݙاں جو انہاں مراکز اتے ٹھکاݨیاں اچ ذخیرہ کیتا ڳیا وݙی مقدار اچ اسلحہ اتے گولہ بارود وی تباہ کر ݙتا ڳیا۔