سیاحت پاکستان دی تقدیر بدلݨ اچ اہم کردار ادا کرسڳدی اے،چیئرمین سینیٹ

اسلام آباد۔27 ستمبر(اے پی پی) چیئرمین سینیٹ سید یوسف رضا گیلانی آکھیے جو سیاحت پاکستان دی تقدیر بدلݨ تے ملکی معیشت کوں تکڑا بݨاوݨ اچ اہم کردار ادا کرسڳدی اے۔ سینیٹ سیکرٹریٹ توں جاری بیان موجب چیئرمین سینیٹ عالمی یومِ سیاحت دے موقع تے اپݨے پیغام اچ آکھیا جو پاکستان دے شمالی علاقے، پہاڑی وادیاں، وادیٔ سندھ دی قدیم تہذیب، تاریخی مقامات تے مختلف مذاہب نال وابستہ صدیاں پراݨے آثار تے ثقافتاں ملکی سیاحتی ورثے دا قیمتی حصہ ہن۔ پاکستان انہاں تھوڑے جیھے ملکاں اچ شامل اے جتھاں چار موسم اپݨے منفرد حسن نال پاتے ویندن جیڑھے ملکی سیاحت دے ودھارے کیتے ہک قدرتی تے اہم اثاثہ ہن۔ انہاں آکھیا جو پاکستان قدرتی حسن، دلکش مناظر، اچے لمبے پہاڑاں، سرسبز وادیاں، صدیاں پراݨیاں تہذیباں تے تاریخی و ثقافتی ورثے نال مالا مال ملک اے جیڑھا دنیا دے اہم سیاحتی مقامات اچ ممتاز مقام عطا کریندے۔ انہاں آکھیا جو سیاحت دا ودھارا نہ صرف معاشی ترقی بلکہ روزگار دے نویں مواقع، مقامی آبادی دی معاشی خوشحالی تے مختلف علاقیں وچال بہتر رابطیں دے قیام دا ذریعہ وی بݨ سڳدے۔ سیاحتی شعبے اچ ترقی نال مقامی لوکاں کیتے کاروبار تے روزگار دے موثر موقع پیدا تھیسن جݙاں جو ملک دے مثبت تشخص کوں عالمی سطح تے مزید اجاگر کرݨ اچ مدد ملسی۔ چیئرمین سینیٹ آکھیا جو پاکستان دے قدرتی تے تاریخی سیاحتی مقامات کوں عالمی سطح تے متعارف کراوݨ کیتے بنیادی ڈھانچے دی بہتری، سڑکاں، مواصلاتی سہولتاں، رہائش تے ٻئی ضروری سہولتاں ݙیوݨ تے خصوصی توجہ ݙیوݨ دی لوڑھ اے۔