معتبر معلومات تئیں رسائی شہریاں دا بنیادی حق اے: صدرِ مملکت

اسلام آباد28 ستمبر( اے پی پی)صدرِ مملکت آصف علی زرداری عالمی یومِ معلومات تئیں رسائی دے موقع تے شہریاں دے حقِ معلومات دے تحفظ دا عزم دوہریندے آکھیے جو جمہوری معاشرے اچ شہری اوں ویلے ہی عوامی زندگی اچ بامعنی کردار ادا کر سڳدن ڄݙاں انہاں کوں ویلھے سر، معتبر اتے قابلِ اعتماد معلومات ملین۔ اپݨے سنیہے اچ صدرِ مملکت آکھیا جو آئینِ پاکستان شہریاں دے حقِ معلومات کیتے واضح بنیاد ݙیندے، 18ویں آئینی ترمیم نال اظہارِ رائے دی آزادی دے آئینی ڈھانچے کوں ٻیا تکڑا کیتے اتے آرٹیکل 19-اے رلائے، ڄیندے تحت ہر شہری کوں عوامی اہمیت دے معاملیاں اچ معلومات تئیں رسائی دا حق اے، ٻھل اے حق قانون دے تحت عائد ضابطیاں اتے معقول پابندیاں نال مشروط اے۔ آصف علی زرداری آکھیا جو رائٹ آف ایکسیس ٹو انفارمیشن ایکٹ 2017ء وفاقی سطح تے معلومات تئیں رسائی کیتے قانونی فریم ورک ݙیندے، ٻھل ڈیجیٹل پلیٹ فارمز، مصنوعی ذہانت اتے ٻیاں ابھردیاں ٹیکنالوجیز دی تیز رفتار ترقی معلومات دی تیاری، ترسیل اتے استعمال دے طریقہ کار کوں تبدیل کر ݙتے۔ انہاں زور ݙتا جو شہریاں دے حقِ معلومات دا تحفظ یقینی ٻݨیندے ہوئیں اے وی ݙیکھݨا ہوسی جو منافع تے مبنی غلط اتے گمراہ کن معلومات روکݨ دیاں کوششاں عوامی مفاد اچ صحافت، منصفانہ تنقید اتے بامعنی عوامی مباحثے کوں دٻاوݨ دا ذریعہ نہ ٻݨن۔