پاکپتن اچ دہشتگردی دا منصوبہ ناکام، کالعدم ٹی ٹی پی دا دہشتگرد گرفتار

ساہیوال۔29 ستمبر(اے پی پی)سی ٹی ڈی 19 ایس پی چوک اچ کارروائی کر تے پاکپتن اچ دہشت گردی دا منصوبہ ناکام ٻݨا ݙتے۔ سی ٹی ڈی حکام دے مطابق کالعدم تنظیم ٹی ٹی پی فتنہ الخوارج نال تعلق رکھݨ والا دہشتگرد پکڑیا ڳئے، گرفتار دہشتگرد دی سنڄاݨ عبدالرحیم سکنہ یونیورسٹی روڈ پشاور دے ناں نال تھئی اے۔ دہشت گرد 19 ایس پی چوک اچ وݙی مقدار اچ بارودی مواد نال موجود ہئی، گرفتار دہشتگرد توں 2 کلو توں ودھ بارودی مواد، 3 آئی ای ڈی بیٹریز، پرائما کارڈز اتے فیوز سرکٹ ملیے۔ سی ٹی ڈی حکام دے مطابق بم ڈسپوزل عملے بارودی مواد کوں ڈیفیوز کیتے۔ دہشت گرد دے خلاف تھانہ سی ٹی ڈی اچ انسدادِ دہشت گردی ایکٹ دے تحت مقدمہ درج کر تے تفتیش جاری اے۔